الأحد، 22 أبريل 2012

يوميات مدام عنايات

الحلقة التاسعة عشر

وصل عبده ومنى النادي عشان يتغدوا واول ما دخلوا جه شاب شال منى من ورا وقعد يهزر معاها وهيه عماله تضحك:
منى:نزلني يا هاني ههههههههههه

هاني:كنتي فين الايام اللي فاتت؟؟؟
عبده:كانت مع جوزها.......
هاني:ايه ده انت اتجوزتي تاني؟؟؟؟
عبده اه عندك مانع؟
منى:ايه يا عبده ده هاني صاحبي من وانا صغيره وزي اخويا بالضبط
عبده:مفيش حاجه اسمها صاحبي,يلا نروح البيت
منى :ايه ياعبده مش هنتغدى؟
عبده:هنطلب اكل ديلفري
منى:انا عايزه اقعد شويه مع اصحابي روح انت وانا هاجي كمان ساعتين
عبده: خليكي براحتك
وركب العربيه وساق بسرعه وهوه حاسس انه عايش كابوس فظيع وقعد يلف بالعربيه كتير وفي الآخر لي نفسه تحت بيته فحس انه مكسوف يطلع وقعد يبص على الشباك وحس انه عنايات والولاد وحشوه اوي وبعدين مشي وراح يستنى منى عشان يحط حدود لتصرفاتها اللي مبقاش مستحملها اكتر من كده............

عنايات كانت قاعده في البلكونه مع هدى وبيتكلموا:
هدى:عامله ايه دلوقتي؟
عنايات: الحمد لله
هدى:انا لولا ان الحمل تاعبني كنت جيت المستشفى وكمان عشان آخد بالي من مي ومحمد مكنتش عايزاهم يشوفوكي في المستشفى
عنايات:الف مبروك يا هدى على الحمل ربنا يتملك على خير ومش عارفه اشكرك ازاي على اللي عملتيه مع الولاد
هدى:ايه ده يا عنايات ده انتي زي اختي وربنا اللي يعلم بحبك قد ايه
عنايات:انا عارفه
هدى:عبده مكلمكيش؟
عنايات:لا ,بس كلم مامته انهارده وقالها انه هيكتب الشقه باسمي بكره وهيشتريلي عربيه اخر الاسبوع
هدى: هوه ده اللي هيريحك؟؟؟
عنايات:قصدك ايه؟
هدى:انت فاهمه قصدي
عنايات:اه..قصدك على عبده والحب وكده يعني؟
هدى: ايه يا عنايات اه عبده غلط في حقك بس برده ده انتوا الاتنين اقوى قصة حب شفتها في حياتي
عنايات: تفتكري باللي عمله ده غلط في حقي؟
هدى: اه غلط غلطه كبيره
عنايات :لو كان غلط كنت سامحته لكن عبده بجد دبحني باللي عمله وعلى فكره انا لغاية دلوقتي حاسه اني بحلم وبصحى من النوم ادور عليه بس مش بلاقيه ومش بسمع شخيره ههههههه هوه اه بقيت بنام في هدوء بس برده شخيره كان عامل احلى شغل (وقعدت تضحك ودموعها بتنزل وبعد كده عيطت جامد اوي وهدى طبعا قعدت تعيط وتحضنها...........)
تاني يوم صحيت عنايات على تليفون من رقم غريب فقالت لنفسها لو كان اللي بيعاكس بجد هبهدله فردت:
عنايات :الو (بصوت عصبي جدا)
ياسر:ايوة يا عنايات انا صحيتك ولا ايه؟
عنايات: ياسر؟انا اسفه جدا افتكرتك حد تاني ,صباح الخير
ياسر : صباح الخير
عنايات:ها عندك اخبار حلوه
ياسر:والله يا عنايات........
عنايات:خلاص خلاص يا ياسر شكرا انك حاولت وانا......
ياسر: استني استني نا بهزر معاكي
عنايات : بجد يا ياسر
ياسر :طبعا هتشتغلي معانا هوه انا شويه في الشركه ولا ايه؟
عنايات: خلاص عرفت وضعك وبجد مش عارفه اشكرك ازاي؟
ياسر: اشكريني انك تيجي تمضي العقد الساعه 10 بالضبط
عنايات:10 بالثانيه هكون عندك ان شاء الله
ياسر: مستنيكي مع السلامه
عنايات:مع السلامه
وقامت عنايات وهي فرحانه وحاسه ان خطتها ابتدت تنجح وقامت على الحمام واستعدت عشان تنزل تروح الشركه ......

قام عبده من النوم لقي منى بتلبس فقالها الساعه كام؟
منى:الساعه 9ليه؟
عبده؟ مصحتنيش ليه كده هتأخر؟
منى :مرضتش اضايقك
عبده:طيب انا عايزك في موضوع
منى: بعدين يا عبده
عبده:لا مش بعدين دلوقتي حالا
منى:خير يا عبده ؟
عبده:دلوقتي احنا اتجوزنا وانا سيبت بيتي عشانك صح؟
منى:انا مطلبتش منك تسيب البيت
عبده:بس هوه ده اللي حصل والمفروض تقومي بواجبك كزوجه
منى: يعني عايزني اطبخ وانظف واغسل والحاجات ده؟
عبده: ما كل ست متجوزة بتعمل كده
منى: بس انا مبعرفش
عبده : تبقي تتعلمي
منى:انت عايزني اكون جاريه عندك ولا ايه؟
عبده:هي اللي تخدم جوزها تبقى جاريه
منى:اه طبعا انا عندي حياتي واصحابي
عبده :نيجي بقى لحكاية اصحابك ده
منى: مالهم اصحابي بقى مش عاجبينك زلا ايه؟دول ولاد ناس ومحترمين
عبده:اه ولاد ناس ومحترمين بس مش عايزك تعرفيهم تاني
منى بصت لعبده كانه قال كلام غريب ومش منطقي فقالت....................
هكملكوا بعد شويه ان شاء الله

ليست هناك تعليقات:

إرسال تعليق