الخميس، 26 أبريل 2012

بتحبني ؟

 

 

الحلقة السادسة

 

صحيت ليلى من النوم لقيت خالد بيبصلها اوي فاتعدلت ورجعت شعرها لورا وسألته:
ليلى:احنا وصلنا ؟

خالد:ايوة , مروة نزلت عند بيتها ويتكم فاضله عشر دقايق تقريبا
ليلى:انا نمت كتير اوي
خالد:كان شكلك زي البيبي
ليلى وشها احمر:بكره ان شاء الله هجهز كل الشغل وهقدمه
خالد:هستناكي الصبح في مكتبي
ووقف السواق عند بيت ليلى ونزلت وقالت لخالد:
ليلى: تصبح على خير
خالد: وانتي من اهله
وطلعت ليلى العماره بس افتكرت ان عربيتها مركونه تحت الشركه فقررت تاخد تاكسي الصبح وهي رايحه وطلعت ولقيت باباها ومامتها مستنينها وقعدت تحكيلهم كل اللي حصل وقعد باباها يضحك لما قالت انها نامت وهما راجعين وهي اتغاظت منه:
ليلى:نمت غصب عني على فكره
باباها:اكيد المدير بتاعك هيقول عليكي كسلااااانه ههههههههههههه
ليلى:مش كفايه كنت لابسه كعب عالي طول اليوم واستحملت
مامتها:يلا يا حبيبتي قومي خدي شاور ونامي
ليلي:تصبحوا على خير
باباها وهو لسه بيضحك:وانتي من اهله
ليلى:ماشي يا بابا
دخلت ليلى سريرها وكانت تعبانه بس مجالهاش نوم فضلت تفكر فخالد وسالت نفسها ازاي شخصيته قويه وفنفس الوقت هادي ومش بيتكلم كتير و..................... نامت وهي بتفكر فيه.
وصل خالد بيته وطلع لقي مامته واخته مي مستنينه على العشا واول ما دخل :
خالد:مساء الخير
مي:اتأخرت اوي انا جعت خالص
خالد:طيب يا ستي هغسل ايدي بسرعه
مامته:على مهلك يا حبيبي
وجه خالد قعد عالسفره وفضلت مي تحكي عملت ايه في الكليه بتاعتها وخالد عمال يسمعها باهتمام بس مامته بصتله وسألته:
مامته:مالك يا خالد؟
خالد:ابدا يا ماما مفيش
مامته: شكلك بتفكر في حاجه
خالد:ما انتي عارفه الشغل يا ماما
مامته:يا بني ارحم نفسك شويه نفسي اشوفك متجوز وعيالك ماليين عليه البيت
خالد:ان شاء الله يا ماما بس اطمن على مي الاول
مي:ايوه طبعا
مامتها:عيب يا بنت انتي لسه صغيره
مي:يعني مش هتجوز ولا ايه مش فاهمه
خالد:لا يا حبيبتي هتتجوزي وهعملك فرح محصلش
مي: ربنا يخليك ليه يا خالد يا رافع من معنوياتي ههههههههههه
مامتهم:ربنا يخليكم لبعض
واستأذن خالد ودخل اوضته خد شاور ودخل في السرير ولقي نفسه بيفكر في مي بس حاول يشيلها من تفكيره عشان هو لسه مش مستعد يدخل اي علاقه بعد علاقته بزميلته في الكليه واللي انتهت بان قلبه اتكسر بعد ما سابته عشان ظروفه الماديه وقتها وحاول خالد ينام بس لقي نفسه افتكر كل حكايته مع هايدي وازاي كانوا بيحبوا بعض اوي بس بعد ما تخرجوا جت في يوم قالتله ان جالها عريس مناسب وانه لسه في بداية حياته وهي مش هتقدر تستناه وافتكر شكلها وهي بتودعه وخرجت من النادي وركبت مع شاب راكب عربيه احدث موديل وهو فضل يبص عليها لغاية ما اختفت عن عينيه وحس ان دموعه بتنزل غصب عنه بس قرر يومها ان عمره ما هيحب تاني ابدا وانه هيعيش يشتغل وينجح في حياته وفعلا اتعين في الشركه وخلال 8 سنين بقى مدير للفرع وقابل بنات كتير بس كان دايما بيفتكر هايدي و ويفتكر ان مفيش واحده تستاهل يديها قلبه ومشاعره............. غطى خالد وشه بالمخده ونام عشان عنده شغل بدري.



ليست هناك تعليقات:

إرسال تعليق