بعد الفرح

 

 

الحلقة السابعة عشر

 

 

رجع حسام من الشغل لقي الجو هادي وآدم ملوش صوت فدخل يدور على مي لقيها واقفه ولابسه شورت جينز قصير وبادي ابيض وشعرها قصته لغاية نص ظهرها وعاملاه لونين عسلي في بني وشكلها حلو اوي وكانت احلى من ايام الخطوبه فقالها
حسام:ايه الجمال ده كله؟
مي:وطي صوتك آدم لو صحي مش هينام تاني
حسام:حاضر حاضر
وخدها من ايديها ودخلوا اوضة الانتريه وقعدوا على الكنبه وقالها:
حسام:وحشتيني موووووووت بس ايه المفاجآت ده كلها؟
مي:انا قلت لازم اغير عشان تحس اني لسه حلوه
حسام:بس انا علطول شايفك حلوه في عيني
مي:لا بس انا تخنت اوي وجسمي بقى غريب
حسام:انا مش حاسس بكده خالص المهم انتي خلاص ينفع؟
مي وهي مكسوفه: ينفع ايه؟
حسام:ينفع اي حاجه؟
مي:آه ينفع
وحضنها حسام جامد و................................................. .................................................. ...........
وفات اسبوع ومي ابتدت تتعود على حياتها الجديده ووجود آدم معاها بس مواعيد نومها بقت غير مواعيد نوم حسام بيصحي يروح الشغل تكون هي لسه داخله السرير مع آدم ويرجع يلاقيها يا دوب مخلصه الاكل يتغدوا ويدخل حسام ينام شويه ولما يصحى تكون مي نامت هي وآدم وبالليل آدم يعيط فحسام يروح ينام بره عشان عنده شغل الصبح وابتدت المسافه بين مي وحسام تبعد ونفسية مي بقت وحشه خالص وحسام بقى عصبي وآدم بيعيط علطوووووووووول.

وفي يوم جت مامت مي تزورها لقيتها بتعيط هي وآدم فقالتلها:
ام مي:بتعيطي ليه يا حبيبتي؟
مي:انا تعبانه يا ماما
ام مي:في حاجه بتوجعك؟
مي:مش بنام كويس وحسام بقى عصبي خالص وآدم علطول بيعيط ومش عارفه ماله
ام مي:اهدي بس وقومي خدي حمام دافي وتعالي نتكلم شويه
قامت مي دخلت الحمام وبصت لنفسها في المرايه لقيت بطنها فظيعه وقعدت تعيط وبعد ما خلصت الحمام خرجت لقيت ىدم ساكت مع مامتها وبيضحك فسألت مامتها:
مي:ليه معاكي بيسكت؟
ام مي:عشان انا مش ببقى متوتره وانا شايلاه ولا متعصبه
مي:اعمل ايه انا تعبت خلاص وزهقت من قعدة البيت
ام مي:بصي يا مي طبيعي ان الطفل بيفضل اول تلات شهور بيعيط ونومه مش منتظم
مي:بس انا مش ملاحقه على شغل البيت وعلى آدم
ام مي:بصي ممكن تتفقي مع شغاله تجيلك مره في الاسبوع تنظف الشقه كلها وانت بس تطبخي وتاخدي بالك من الولد
مي:وحسام مش عارفه ماله بقى عصبي اوي
ام مي:عشان غيران عليكي
مي:غيران عليه ؟من مين؟
ام مي:من آدم طبعا
مي:ايه يا ماما مش معقول
ام مي:يا بنتي الراجل زي الطفل بيغير لما يلاقي مراته مهتمه بالبيبي اكتر منه
مي:يعني اعمل ايه ؟
ام مي:بصي اتعودي كده الوقت اللي حسام بيصحى فيه بعد ما يرجع من الشغل تكوني حميتي آدم ورعتيه كويس فطبعا هينام شويه الوقت ده تقعدي مع جوزك وتاخدي بالك منه وتتكلمي معاه
مي:وبالليل اعمل ايه ىدم بيفضل يعيط
ام مي:خدي آدم وروحي اتفرجي على التليفزيون واشربي حاجه سخنه والصبح ابقي نامي براحتك
مي:هحاول يا ماما واهو كلها كام يوم وآدم يكمل تلات شهور ان شاء الله
ام مي:وعلى اربع شهور هندخله اكل مع الرضاعه عشان ينام كويس وميرضعش كتير بالليل
مي حضنت مامتها:ربنا يخليكي ليه يا ماما مش عارفه من غيرك كنت هعمل ايه
ام مي:لازم تتعبي شويه في بداية كل حاجه وعلى فكره في جيم للسيدات فتح في العماره اللي جنبك اشتركي فيه عشان تشدي بطنك
مي:بجد فتح امتى؟
ام مي:تقريبا اول امبارح عشان شكله جديد
مي:طب انا هنزل اشترك وانتي خليكي مع آدم
ام مي:طيب عايزه فلوس؟
مي:معايا يا ماما شكرا
ونزلت مي واشتركت في الجيم تلات ايام في الاسبوع وابتدت تنزل وزنها وتنفذ نصايح مامتها وحست ان حسام فعلا بيغير من آدم ودلوقتي بقى فرحان انها بتبقى معاه لوحدها وآدم بينام.

بس ابتدت مشكله جديده تظهر في حياة مي ...............