الثلاثاء، 24 أبريل 2012

غرام أرملة

 

الحلقة الرابعة


يوم الجمعه الساعه سبعه صحيت هنا وابتدت تحضر الساندويتشات والعصاير وعملت قهوه وشاي وكيك عشان ياكلوهم في الجنينه وبعدين صحت حماده ولبسته بنطالون باجي رمادي وتيشيرت احمر عليه رسمه رمادي وكوتشي احمر وهيه لبست جينز اسود نازل على واسع ولبست قميص قصير بكم لونه اصفر ولبست كوتشي اصفر والساعه 8ونص نزلت هيه وحماده ركبوا العربيه عشان يروحوا الجنينه......................
صحي حسين من النوم الساعه 8 لبس شورت زيتي وتيشيرت برتقالي وكوتشي ابيض ونظاره شمس بني ونزل ركب العربيه عشان يقابلهم عند الباب الرئيسي والساعه 9بالضبط جه حسين لقيهم مستنين بره الباب واول ما حماده شافه جري عليه وراح حسين شاله على كتفه وراح قطع التذاكر ودخلوا سوا..............

جوه كان حماده عمال يجري ادامهم ويضحك وفضلوا يتفرجوا على الحيوانات وفضلت هنا تصور حماده عند كل الحيوانات وكانت هيه كمان فرحانه عشان اول مره تحس ان حماده مبسوط كده وبعدن قعدوا على الارض بعد ما فرشت هنا مفرش وقعدوا كلهم ياكلوا وحماده قام يلعب حواليهم وحسين قال:
حسين:ده اول مره تيجوا الجنينه؟
هنا:اول مره حماده يجي وانا مش عارفه اشكرك ازاي
حسين:وانا كمان اول مره آجي
هنا ضحكت جامد اوي ورجعت شعرها لورا فحسين حس انها رقيقه جدا وصغيره جدا جدا
حسين:هو والد حماده اتوفى امتى؟
هنا:من خمس سنين ونص كان حماده عنده 6شهور
حسين:كان تعبان؟
هنا:لا ابدا ده كان صحته كويسه جدا بس في يوم قالي انا عندي صداع ورايح انام و مصحيش تاني (سرحت هنا شويه ) وسابني لوحدي
حسين:ربنا يصبرك
هنا:انا ابتديت اتعود خلاص
حسين :بس شكلك صغير اوي على انك تكوني ام حماده
هنا ضحكت ضحكه رقيقه وقالت:اصلي اتجوزت اول ما اتخرجت وربنا رزقني بحماده بعد 9 شهور
حسين:انتي عندك 28 سنه
هنا:لا 27سنه
حسين:انتي مدرسة ايه؟
هنا:انا مدرسةEnglish
حسين:انتي ليه عايشه لوحدك؟
هنا:لا انا مامتي عايشه معايا بس حصل ظروف ولادة اختي فماما راحت تقعد معاها
هنا:انت بتشتغل ايه؟
حسين:تتوقعي بشتغل ايه؟
هنا:مش عارفه محاسب مثلا
حسين :لأ
هنا:دكتور؟
حسين:لأ
هنا :خلاص مش عارفه
حسين:انا يا ستي مهندس اتصالات في شركة محمول
هنا:طيب ده شغلانه ممتعه جدا
حسين :ليه ؟
هنا:اصلي كان نفسي ادخل هندسه قسم اتصالات
حسين:وليه مدخلتيش؟
هنا:المجموع طبعا
حسين قعد يضحك وهنا قالتله :
هنا:طبعا ما انت اكيد جبت مجموع كبير
حسين:لا انا كنت ثانويه عامه قديمه فكنت جايب86ودخلت هندسه
هنا:يا محظوظ
وجه حماده ياخد ساندويتش كمان وراح يكمل لعب
هنا:تحب تشرب شاي ولا قهوه؟
حسين:ممكن قهوه
هنا صبت كوباية قهوه وقدمته لحسين مع طبق كيك
حسين:انا اول مره آكل كتير كده في الفطار
هنا:بالهنا والشفا
حسين:حلوه اوي الكيكه ده انتي اللي عاملاها؟
هنا:آه اتعلمتها من مامتي
حسين:بجد لذيذه جدا
هنا ضحكت وقعدت تبص على حماده وهو بيلعب وحسين حس ان هنا كل حاجه فيها عكس سلمى طليقته مش عصبيه وشاطره في المطبخ وبتصحى بدري وعلطول بتبتسم وقعد يفتكر حياته اللي قضاها مع سلمى اللي كانت طول الوقت بتتخانق معاه على اي حاجه يقولها او يعملها و..............
هنا:سرحت في ايه؟
حسين:لا ابدا اصل ده اول جمعه يعدي عليه من سنه من غير مشاكل
هنا:مش فاهمه
حسين:اصلي لسه منفصل عن مراتي من اسبوع
هنا:مكنش ينفع تحلوا مشاكلكم
حسين:اي حاجه ليها حل الا العصبيه الزايده عند الست او الراجل
هنا:اكيد انت بتبالغ

حسين:ببالغ؟انا عشت معاها سنه مفيش يوم عدى غير لما الجيران يسمعوا صوتها وانا حاولت كتير افهمها انها ممكن تتكلم بهدوء بس مفيش فايده
هنا:يمكن صغيره والمسؤوليه كبيره عليها؟
حسين:ده اكبر منك بسنتين
هنا:معلش ان شاء الله ربنا يسهل وتهدى وترجع تفكر بهدوء وتحل المشكله ده وهي اكيد هتغير من نفسها
حسين:سلمى عمرها ما هتتغير ابدا
وقام حسين وقعد يلعب بالكوره مع حماده وفضلوا كده لغاية معاد الصلاه فاستأذن حسين عشان يروح يصلي الجمعه ويرجعلهم وسابهم في مكان وقال انه مش هيتأخر.......................
ايه اللي هيحصل لما يمشي حسين ؟



ليست هناك تعليقات:

إرسال تعليق