آنسة كومبيوتر

 

الحلقة السادسة

فات اسبوع عبير في الكليه عادي وكل يوم تحضر محاضراتها وتقابل صفاء وساعات ايمان وبقت بتحب هدى زميلتها اوي لانها مؤدبه و هاديه جدا ومقابلتش احمد خالص و اتفقوا ترجعله القصص فالنادي يوم الخميس.
يوم الاربع خرجت من الكليه هي وصفاء وراحوا يشتروا فساتين عشان عيد ميلاد منه واول ما وصلوا المول فضلت صفاء تقيس كل حاجه تعجبها و عبير مش مهتمه خالص وصفاء في الآخر اختارتلها فستان قصير لونه بينك ورقيق و اول ما عبير شافته قالت:
عبير:انت بتهرجي مش كده؟
صفاء:ايه يا بنتي ده شكله جميل جدا
عبير:انا لا يمكن البس فستان قصير كده
صفاء مسكت فستان طويل بس حمالات وصدره مفتوح وقالت:
صفاء:ها ايه رأيك بقى؟
عبير:طبعا لأ
واختارت عبير فستان بكوم طويل بني ونازل على واسع واختارت معاه حزام دهبي عريض وبعد ما قاسته صفاء قالتلها:
صفاء:لذيذ بس...........
عبير:بس ايه؟
صفاء:مش سننا يا عبير احنا لسه مكملناش 18 سنه
عبير:انا هاخده هو عجبني ومرتاحه فيه
صفاء اشترت فستان ابيض قصير وكات وشوز فضي وحزام فضي ودفعوا الفلوس وخرجوا من المول ركبوا تاكسي ونزلت عبير عند عمارتها وهي داخله قابلت احمد:
احمد:ازيك يا عبير؟
عبير:ازيك
احمد:ها قريتي القصص؟
عبير:فاضلي واحده بس ان شاء الله هرجعهم بكره في النادي زي ما اتفقنا
احمد:اوكيه وانا هجيبلك مجموعه تانيه
عبير باهتمام:لاحسان عبد القدوس برده؟
احمد:وروايات لطه حسين كمان يا ستي
عبير:متشكره يا احمد
و ركبوا الاسانسير مع بعض واحمد بص عالشنطه في ايد عبير:
احمد:انتي اشتريتي حاجات جديده؟
عبير:ايوه اشتريت فستان عشان عيد ميلاد منه بكره فالنادي
احمد:انا كمان رايح على فكره
عبير:اوكيه اشوفك بكره
احمد:ان شاء الله
وفتحت باب الاسانسير و خرجت دخلت الشقه واتغدت وخدت شاور ونامت عشان بكره وراها يوم طويل اوي.................


يوم الخميس رجع احمد من شغله اتغدى ولبس بنطالون جينز ازرق وعليه قميص ابيض بكوم وايمان لبست فستان لونه ازرق فاتح و فردت شعرها واخدوا الهديه لمنه ونزلوا عشان يحضروا العيد ميلاد.

عبير رجعت من الكليه اتغدت و خدت شاور وابتدت تستعد عشان العيد ميلاد لبست الفستان البني الجديد وعليه الحزام وسرحت شعرها وسابته كيرلي ووقفت ادام المرايه وحست ان في حاجه ناقصه يمكن الفستان شكله مكبرها وكمان النظاره لونها عواجيزي والتقويم ده اللي زهقت منه بس معلش هي ناويه تغير كل ده بس لما الدكتور يشيل التقويم بتاع السنان , وسلمت على باباها ومامتها ونزلت عشان تروح العيد ميلاد واول ما دخلت لقيت صفاء وايمان واقفين وكان شكلهم زي القمر وسلموا على بعض وقعدوا يستنوا منه لما تيجي وبعد شويه دخلت منه وهي لابسه فستان دهبي ضيق وقصير وفارده شعرها وكانت عاملاه عند الكوافير واول ما دخلت اصحابها قعدوا يغنولها وجه عمر باسها واداها هديه عباره عن سلسله دهب ولبسهالها وبعد كده وقفوا كلهم عشان يطفوا الشمع وبعد البيفيه ابتدوا يعملوا فقرات و مسابقات واول مسابقه عن ملكة جمال الحفله وطلعوا بنات كتير عشان يترشحوا وبعد التصفيات كسبت منه وقعدت ترقص على اغنيه اجنبي وبعد كده عملوا مسابقه لاوحش بنت وطبعا محدش وقف من البنات فالDJطلب كل واحد يكتب اسم بنت في ورقه وانه هيعد الاصوات عشان يعرف مين اللي هتفوز بجايزة اوحش بنت في الحفله وبعد ما جمعوا الورق اعلن الDJان اوحش بنت في الحفله هي آنسه كومبيوتر وكل الشباب بصوا على عبير وقعدوا يضحكوا بس عبير ما كنتش تعرف ان هي اسمها كده في النادي وصفاء كانت عارفه بس مرضيتش تقولها وقرب عمر من عبير وقالها :
عمر:اتفضلي الجايزه يا آنسه كومبيوتر
عبير بصت حواليها ولقيتهم كلهم بيضحكوا وحست بدموعها ملت عينيها وطلعت تجري من الحفله عشان تروح وتقعد لوحده في اوضتها بس وهي خارجه من باب النادي لقيت احمد قدامها واول ما شافها بتعيط قالها:
احمد:ايه يا عبير مالك بتعيطي ليه؟
عبير وهي منهاره:م.. م.. مفيش حا..حا..حاجه
احمد:طيب تعالي اقعدي هنا واهدي واحكيلي ايه اللي حصل
عبير:م ..ش عا..يزه ات..كلم
احمد:طيب بس اهدي خالص وكل حاجه ليها حل
وبعد ربع ساعه عبير هديت وحكت لاحمد اللي حصل وهو قالها:
احمد:وينفع شوية شباب تافه زي دول يخلوكي تعيطي كده
عبير:منظري كان وحش ادام كل النادي
احمد:فكرتي هما عملوا كده ليه؟
عبير:اكيد عشان انا اوحش بنت
احمد وهو بيبتسم:لا طبعا مش ده السبب
عبير وهي بترفع النظاره:امال ايه السبب؟
احمد:هما متغاظين عشان انتي مش تافهه زيهم ووقتك علطول مشغول بحاجات مفيده
عبير:بس انا عارفه ان انا شكلي وحش
احمد:متقوليش كده , وعلى فكره انتي جميله جدا بس محتاجه تضبطي شوية حاجات كده
عبير:حاجات ايه؟
احمد:يعني هتسمعي كلامي وتنفذيه؟
عبير بتبصله كأنه هو اللي هيخليها جميله:اوكيه
احمد: شوفي يا ستي .........................