السكرتيرة الحسناء

 

 

الحلقة الثامنة

 

 

تاني يوم الصبح نزلت شهد عشان تفطر وكانت لابسه فستان جينز كحلي قصير نص كم وعليه صاندال ابيض ونظاره شمس بيضا وكانت لامه شعرها ديل حصان لفوق وقابلت احلام وقعدت معاها يقروا الجرايد وبتبص لقيت معتصم جه وكان لابس شورت بيج وعليه قميص نص كم لونه اخضر وفيه ورود بيج وابيض ولابس كوتشي ابيض واول ما وصل عندهم عملت شهد نفسها مش واخده بالها:
معتصم:صباح الخير يا مدام احلام
احلام :صباح الخير يا معتصم
معتصم:صباح الخير يا شهد
شهد بكل تقل :صباح النور ( وكملت قراية الجرنال )
فقعد معتصم جنبها وقالها بصوت واطي:انت مخاصماني؟
شهد:لا طبعا ده حضرتك مديري
معتصم:مديرك؟
شهد:مش حضرتك مديري برده؟
معتصم:انتي بتكلميني كده ليه؟
شهد:مش انت عايز كده خلاص انا هعاملك زي ما انت عايز (وقامت عشان تتمشى فمعتصم قام وراها واحلام قعدت تضحك عليهم)
معتصم:استني يا شهد
شهد:افندم اي خدمه
معتصم:ارجوكي حاولي تفهميني
شهد:فهمني انت وانا هفهم
معتصم:يا شهد انا بتشدلك بطريقه عمرها ما حصلت معايا قبل كده
شهد:وعشان كده بتعاملني كده ؟
معتصم:يا شهد انا اكبر منك بكتير
شهد:والله انا مش حاسه انك عجوز
معتصم:يا شهد انت سه معندكيش اي تجارب
شهد:تقصد ايه؟
معتصم:انا خايف اظلمك لو اتقربتلك واتعلقتي بيه وفي الآخر طلعت مش الشخص المناسب ليكي
شهد:من فضلك متاخدش قرارات بالنيابه عني
معتصم:يعني انت حاسه بحاجه من ناحيتي؟
شهد:انا متلخبطه واسلوبك مخليني مش بعرف افكر كويس
معتصم:انا آسف ,.تسمحي نبدأ جديد
شهد:اوكيه
معتصم:انا اسمي معتصم
شهدوهي بتضحك:وانا شهد سكرتيرة سيادتك
معتصم:طيب يلا يا سكرتيرتي عشان نفطر وبعد كده اعلمك الغوص
شهد :بجد ؟ انت بتعرف؟
معتصم:ده انا هخليكي تشوفي حاجات عمرك ما تتخيلي انها موجوده في الدنيا
شهد:طب يلا بينا
ورجعوا تاني لاحلام وقعدوا فطروا سوا وبعدين استأذنوا عشان يروحوا يغوصوا واحلام قالتلهم يخلو بالهم من بعض وبصت عليهم وهما بيبعدوا وحست ان فيه قصة حب جديده بتتولد هنا في شــــــــــــــــــــــــــــــــــر م الشيـــــــــــــــــــــــــــــــــخ............ ........................
راح معتصم وشهد مركز الغطس في القريه ولبسوا بدل الغطس وركبوا مركب ودخلوا جوه في البحر وهناك قال معتصم:
معتصم:بصي يا شهد في الاول هننزل عمق بسيط عشان ده اول مره ليكي وخليكي جنبي
شهد:اوكيه
ولبسها ادوات الغطس وهوه لبس ونزل معتصم ووراه شهد وتحت الميه مسك معتصم ايديها وابتدوا ينزلوا براحه وحست شهد انها في دنيا تانيه وشافت الوان الشعب المرجانيه قد ايه جميله ومجموعات السمك الملون اللي بتعدي جنبها وبعد شويه شاورلها معتصم عشان يطلعوا وطلعوا مع بعض وشالوا النظارات وسألها :
معتصم:ها ايه رأيك؟
شهد:انا مش مصدقه ان بلدنا فيها جمال بالشكل ده
معتصم:بلدنا فيها شواطئ تعتبر من اجمل الشواطئ في الدنيا وخصوصا شرم الشيخ تعرفي انا بكره هاخدك ونروح نركب القارب الزجاجي بجد تحفه تلاقي البحر كله تحتك بالوانه واسماكه شئ رائع.
شهد:احنا مش هنغطس تاني
معتصم:كفايه كده انهارده وبكره هنكمل
وطلع معتصم المركب وساعد شهد ورجعوا تاني القريه واتفقوا يغيروا هدومهم ويتقابلوا بعد ساعه وفعلا طلعت شهد اوضتها وهي طايره من السعاده وحست انها بتتعلق بمعتصم كل يوم زياده.........................
معتصم دخل اوضته وهو فرحان ان هو خد قرار واتقرب من شهد وقرر يسيب الايام هي اللي تقول قراره كان صح ولا غلط.....................