بعد الفرح

المقدمة

كل القصص بتنتهي بجواز البطل والبطله لكن المره دي هتبتدي القصه من بعد ما العروسه والعريس روحوا بيتهم وهما فرحانين ببعض:
البطل اسمه حسام والبطله اسمها مي اتجوزوا بعد قصة حب اربع سنين وقبل ما احكيلكم ازاي حبوا بعض تعالوا نشوف شكلهم قبل الجواز
حسام بيلبس شيك جدا وعلطول ريحة البيرفيوم بتاعته بتملا المكان وعربيته منظمه وريحتها حلوه وطبعا عمر مي ما شافته مربي دقنه
فحسام طويل وابيض وشعره اسود وناجح في شغله بيشتغل محاسب في نفس الشركه اللي بتشتغل فيها مي وهناك اتعرفوا وحبوا بعض
اما مي قصيره وقمحاويه وشعرها اسود طويل وبتلبس شيك جدا وعلطول عامله شعرها (اصل شعرها مش ناعم اوي ) واول حاجه لفتت نظر حسام فيها شكلها الرقيق واهتمامها بنفسها وبجسمها وطبعا اخلاقها الممتازه.
حبوا بعض بعد ما مي اتعينت محاسبه في نفس القسم اللي بيشتغل فيه حسام واتفقوا على الجواز لما ظروفه تسمح وابتدت مي تشجع حسام يدخلوا جمعيات عشان يخلص الشقه وفعلا بعد اربع سنين من التحويش والجمعيات قدر حسام يشطب الشقه واتقدم لمي وباباها رحب بيه وحددوا معاد الفرح اللي كان في نادي بسيط بس كان حلو جدا وطبعا بابا مي ساعد حسام في الجهاز والحمد لله عدى الفرح على خير وروح العريس والعروسه البيت وابتدى اول يوم ف حياتهم الزوجيه...............................