الخميس، 26 أبريل 2012

بتحبني ؟



الحلقة الخامسة




تاني يوم وصلت ليلى الشركه وكانت لابسه بدله بنيي وتحتها بلوزه نبيتي وشوز نبيتي بكعب عالي وفتحت باب مكتبها لقيت خالد مستنيها وكان بيبص من الشباك وسرحان فمعرفتش تقول ايه بس هو حس بوجودها و قالها:
خالد:صباح الخير يا ليلى

ليلى :صباح الخير
خالد:ادامك ربع ساعه تكوني جاهزه عشان هنروح نعاين المنتجع
ليلى:اوكيه
بعد ربع ساعه كانت ليلى مستنيه عند السكرتيره ومعاها الاوراق اللي مجهزاهاوفعلا خرج خالد من مكتبه وكان معاه اوراق وقال:
خالد:مستعدين؟
ليلى:ايوة
السكرتيره:مستعده يا فندم
ونزلوا تحت ركبوا عربية الشركه وكان السواق مستنيهم واتحركت العربيه للعين السخنه وهما قاعدين ابتدى خالد يقول حاجات للسكرتيره وهي بتكتبها و ليلى مسكت موبايلها واتصلت بباباها:
ليلى:الو يا بابا
باباها:ايوه يا حبيبتي عامله ايه؟
ليلى:انا كويسه بس بقولك اني رايحه العين السخنه عشان عندي شغل
باباها:رايحه لوحدك؟؟؟؟؟؟؟؟؟؟؟؟؟؟؟؟
ليلى:لا متقلقش معايا المهندس خالد ومدام مروه وراكبين عربية الشركه
باباها:طيب خلي بالك من نفسك وانا هتابعك بالموبايل
ليلى:اوكيه مع السلامه
باباها:مع السلامه
خالد:خير بابا قلقان عليكي؟
ليلى:لا ابدا بس ده اول مره اسافر من غيره
خالد:انتي عندك اخوات؟
ليلى:لا انا بنت وحيده
خالد:متقلقيش هنرجع بدري
ليلى:انا مش قلقانه خالص
خالد وهو بيضحك:طيب يا ستي انا اللي قلقان
وضحكت مروه السكرتيره وليلى ضحكت برده عشان تداري كسوفها وخصوصا انها كانت خايفه عشان مسافره لوحدها من غير باباها ومامتها لأول مره بس خالد اداها احساس بالأمان من غير ما يتكلم...............
وصلوا العين السخنه واستأذنت مروه وليلى عشان يروحوا الحمام وهناك:
مروه:انتي ازاي هتقضي اليوم بالكعب ده؟
ليلى:انا مكنتش اعرف اننا هنسافر
مروه:اصل المعاد اترتب فجأه بس انا اتعودت على كده فبعمل حسابي في شوز مناسب
وغسلوا وشهم وخرجوا لقيوا خالد مستنيهم في مطعم المنتجع وبيشرب قهوه مع شاب وبيتكلموا فقعدوا معاهم وعرفهم خالد على الشاب:
خالد:اعرفكم بالمهندس ايهاب ابن صاحب المنتجع ومديره
ايهاب:اهلا بيكم
خالد:اقدملك ليلى اجدد موظفه عندنا وطبعا مروه سكرتيرتي متهيألي قابلتها قبل كده
ايهاب:ايوة فعلا , اتشرفنا يا ليلى
ليلى:اهلا بيك
وابتدوا يتكلموا عن تفاصيل المشروع ومروه بتكتب كل كلمه خالد بيقولها وليلى بتكتب ملاحظاتها وبعدين قاموا كلهم عشان يتفرجوا على المنتجع وشافوا الخدمات الكتير اللي بيقدمها زي حمامات السباحه باحجامها المختلفه وصالات الجيم واماكن لالعاب الاطفال ده غير اكتر من مطعم وكافيه لخدمة زوار المنتجع وبعد ما شافوا كل الاماكن رجعوا لمطعم علشان يتغدوا وطلبوا بعد الغدا قهوه وبدأ ايهاب يتكلم:
ايهاب:ها ايه رايك يا خالد؟
خالد:هايل وبجد مميز جدا
ايهاب:ايه رأيك يا ليلى؟
ليلى:من غير مجامله ده من اجمل الاماكن اللي شوفتها في حياتي
خالد:ها قوليلنا شوية افكار يا ليلى؟
ليلى:انا كنت محضره شوية افكار بس كان قبل ما اشوف المكان
خالد:ممكن نسمعها برده
ليلى فتحت اللاب توب بتاعها و قالت :اول حاجه عايزين نعمل معرض في الفنادق نعمل دعايه للمنتجع
تاني حاجه هنعمل رحلات مجانيه عشان العملاء يشوفوا المشروع على الطبيعه
تالت حاجه ممكن نعرض خصم لأول 100 شخص يحجزوا هنا
خالد:كويسه اوي الافكار ده يا ليلي , ايه رأيك يا ايهاب؟
ايهاب:ممتاز
خالد:وبعد ما شوفتي المنتجع على الطبيعه هتضيفي ايه كمان؟
ليلى:انا بفكر اصور كل الاماكن هنا وابتدي حملة دعايه على النت ومواقع التواصل الاجتماعي زي الفيس بوك وتويتر وغيرهم
خالد:فكره هايله يا ليلى
ايهاب :هتبدأوا تنفيذ الدعايه امتى؟
خالد:هبعتلك التفاصيل على الايميل لما نرجع الشركه
واستعدوا عشان يرجعوا وودعهم ايهاب وركبوا العربيه وكانوا تعبانين من المجهود اللي عملوه وفضل خالد ومروه يتكلموا وليلى ريحت راسها لورا ونامت........................

ليست هناك تعليقات:

إرسال تعليق