بعد الفرح

 

الحلقة الثامنة

 

 

صحيت مي يوم الجمعه الصبح على اصوات كركبه في المطبخ فبصت جنبها لقيت حسام نايم وواخد كل السرير وبيشخر فقامت تشوف ايه اللي بيحصل في المطبخ
دخلت المطبخ لقيت حماتها بتحضرلهم الفطار (اهوه الست بتساعدها عشان متقولوش عليه ببالغ )
بس يا ريتها ما ساعدتها الزيت على البوتاجاز والمواعين ماليه الحوض وقشر البيض واقع على الارض ومي كان هيغمى عليها عشان لسه منظفه المطبخ امبارح
فقالت لحماتها:
مي: حضرتك بتعملي ايه يا طنط؟
ام حسام:اصلي صحيت بدري قلت احضر الفطار
مي:طب عن اذن حضرتك انا هكمل
ام حسام :لا يا بنتي روحي انت ارتاحي
مي:كتر خيرك حضرتك تعبتي ( ابوس ايدك اخرجي من المطبخ كفايه مش عايزاكي تساعديني)
دخل حسام المطبخ لقي مامته ادام البوتاجاز فقال:
حسام: بتعملي ايه بس يا ماما؟ تعالي يا حبيبتي ارتاحي متتعبيش نفسك
ام حسام:يا ابني انا معملتش حاجه
حسام:من فضلك يا ماما روحي اقعدي , ايه يا مي انتي سايبه ماما تشتغل؟
مي:انا بقولها ترتاح وانا هكمل
حسام:يلا يا ماما عشان ترتاحي
وخرجوا وسابوا مي لوحدها وكانت طبعا عايزه تصرخ من كتر الغيظ بس مسكت نفسها وابتدت تنظف المطبخ وحضرت الفطار وطلعت الاكل على السفره وقالت:
مي:يلا يا جماعه الفطار جاهز
وقاموا وقعدوا يفطروا فحسام قال:
حسام:شفتي يا مي ماما بتحبك و بتساعدك اد ايه؟
مي:طبعا يا حبيبي ده مامتك طيبه اوي ربنا يخليهالنا
ام حسام:على ايه بس يا جماعه ههههههههههههه
وبعد الفطار دخل حسام ومامته الانتريه ومي لمت الاطباق وعملت الشاي وهما قاعدين بيشربوا الشاي رن موبايل مي:
مي:الو
ام مي:ايوه يا حبيبتي ,صحيتك؟
مي:لا يا ماما انا صحيت من بدري
ام مي:طب بقولك يا حبيبتي تعالي اتغدي معانا انهارده ابوكي عازمكوا
مي:مش هينفع يا ماما اصل طنط عندنا
ام مي:طنط مين اللي عنكوا؟
مي:حماتي
ام مي: لحقت تيجي؟
مي:ده بايته من امبارح
ام مي:طب معلش شويه وهتروح اكيد
مي:قصدك بعد اسبوع
ام مي:اسبوع ايه يا بنتي انتي بتهزري؟
مي:لا يا ماما اصلها هتقعد معانا اسبوع تونسنا عقبال يوم العزومه يوم الجمعه
ام مي :عزومة ايه؟
مي:اهل حسام هيجوا يتغدوا عندنا يوم الجمعه
ام مي:لا الموضوع كده زاد اوي , انا جايالك انهارده
مي:يا ريت يا ماما ده انا تعبت خالص
ام مي:معلش يا حبيبتي متزعليش واكيد هنلاقي حل وعايزاكي تخلي بالك من نفسك لتكوني حامل
مي:حامل؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ام مي:ايوه يا حبيبتي ممكن جدا
مي:حمل مع العذاب للي انا فيه؟
ام مي:دي سنة الحياه يا حبيبتي
مي:طب تعالي بدري متتأخريش
ام مي:ارتاحي انتي وانا هجيبلك غدا معايا
مي:طيب مع السلامه
ام مي:مع السلامه يا حبيبتي
واستأذنت مي عشان تدخل تريح ظهرها وفضل حسام ومامته يتفرجوا عالتليفزيون ومامته قالتله:
ام حسام:مراتك باين عليها بتنام كتير تكنش حامل؟
حسام:مش عارف تفتكري؟؟؟؟؟؟؟؟؟؟
ام حسام:يا رب يا حبيبي اشوف عيالك
حسام:يا رب يا ماما
وبعد شويه رن جرس الباب وفتح حسام لقي حماته جت فقال:
حسام:اهلا يا حماتي اتفضلي (ايه اللي جابك بدري كده يا ساتر الواحد ميعرفش يرتاح يوم اجازته )
ام مي:اهلا يا حبيبي,دخل الشنط ده المطبخ
حسام:ليه التعب ده بس يا حماتي
ام مي:تعبكوا راحه يا حبيبي,امال فين مي؟
حسام:نايمه شويه , اتفضلي حضرتك ماما جوه وانا هصحي مي
ودخلت ام مي وسلت على ام حسام :
ام مي:اهلا يا حبيبتي عامله ايه؟
ام حسام:ازيك يا حبيبتي,انا جيت امبارح فالولاد مسكوا فيه ابات يومين
ام مي:طبعا يا حبيبتي ده بيتك (هما اللي مسكوا فيكي برده؟؟؟؟؟؟؟؟)
وجت مي وسلمت على مامتها :
مي:وحشتيني يا ماما
ام مي: وانتي كمان عامله ايه ومالك خاسه كده؟
مي:انا كويسه ومش خاسه ولا حاجه
ام مي:طب تعالي نوضب الحاجه في التلاجه عن اذنكوا يا جماعه
ام حسام:اتفضلي
ودخلت مي مع مامتها المطبخ ولقيت مامتها جايبالها اكل كتير يكفيها اسبوع فقالت:
مي:ليه بس كده يا ماما ؟
ام مي:يا بنتي كفايه عليكي الشغل
مي:ربنا يخليكي ليه
ووضبوا الاكل في التلاجه وسابوا غدا انهارده وخرجوا يقعدوا معاهم بره وبعد ما حسام رجع من الصلاه ام حسام قالت:
ام حسام:انا هدخل انام في اوضة النوم شويه
حسام:اتفضلي يا ماما
وحسام نام عالكنبه وابتدى يشخر فمي ومامتها دخلوا البلكونه يتكلموا:
مي:انا تعبت يا ماما
ام مي:معلش يا حبيبتي عشان لسه في لاول
مي:ده مش بيساعدني خالص
ام مي:كل الرجاله كده
مي:مكنش كده ايام الخطوبه
ام مي:بصي يا حبيبتي في مثل مصري (ابنك على ما تربيه وجوزك على ما تعوديه)
مي:تقصدي ايه؟
ام مي:انا هفهمك تعملي ايه............................................... .................................................. ...........................


يا ترى مامت مي هتقولها ايه؟؟؟