غرام أرملة

 

الحلقة التاسعة

 

بعد ما حسين طلب من هنا الجواز هنا معرفتش ترد وحست انها مش قادره تفكر خااااااالص فقالت:
هنا:ممكن اروح دلوقت
حسين:مش هتردي عليه؟
هنا:معلش يا حسين انا مجتاجه اقعد لوحدي,يلا بينا يا حماده
حماده:احنا هنروح ليه؟
هنا:معلش يا حبيبي اصل انا تعبانه شويه
حسين:انا همشي وراكي بالعربيه
هنا:طيب ,يلا بينا
وروحوا البيت ودخلت هنا شقتها وشغلت لحماده كارتون ودخلت اوضتها وقفلت عليها وقعدت على السرير تعيط حست انها مضغوطه وانها مش عارفه تاخد قراروفي نفس الوقت مشدوده لحسين بس مش قادره ترتبط باي حد بعد جوزها الله يرحمه وبعد قصة الحب اللي كان بينهم ورن موبايلها فردت:
هنا:الو
مامتها:ايوه يا حبيبتي
هنا:ازيك يا ماما وازي فرح؟
مامتها:بخير يا حبيبتي اختك جابت بنوته زي القمر وسمتها هنا
هنا:ما شاء الله الف مبروك هي صاحيه اكلمها؟
مامتها:لا يا حبيبتي دي لسه في البينج
هنا:طيب يا ماما الف حمدلله على سلامتها بوسيلي البيبي عبال ما آجي انا وحماده
مامتها:طيب يا حبيبتي على مهلك وانت سايقه
هنا:متقلقيش يا ماما , مع السلامه
مامتها:مع السلامه
وراحت هنا غيرت هدومها هي وحماده ونزلت وكان حسين واقف في البلكونه ولقيها نزلت تاني فاستغرب هي رايحه فين؟
وفضل يفكر يا ترى هو ليه اتشدلها بسرعه كده؟ ويا ترى هي هتوافق على موضوع الجواز ؟ وفضل كل شويه يدخل البلكونه يشوف هنا رجعت ولا لسه.........
دخلت هنا المستشفى وكان معاها بوكيه ورد كبير وسلسله دهب للبيبي وسألت على الاوضه اللي فيها اختها وخبطت ودخلت لقيت مامتها واختها وجوزها وابنها والبيبي وسلمت عليهم وباست اختها وشالت البيبي وكانت شبها خالص وفرحت عشان سموها هنا وفضلت قاعده معاهم وقالت لمامتها انها هتاخد عمر ابن اختها معاها انهارده عشان يلعب مع حماده وروحت بالليل ومعاها الولدين وركنت عربيتها وطلعت العماره وكان حسين باصص من فوق ولقيها معها ولد اصغر من حماده فاطمن انها رجعت بالسلامه بس قعد يفكر يا ترى مين الولد ده؟
دخلت هنا الشقه وعشت الولدين و غيرتلهم هدومهم وفضلوا يتفرجوا على التليفزيون وهي خدت دش ولبست قميص قطن قصير لونه موف في ابيض وخدت ماج نيسكافيه ودخلت البلكونه وفضلت تفكر في حسين وكلامه معاها في النادي وحست انها محتاجه مامتها بس معرفتش تحكيلها اي حاجه في المستشفى عشان جوز اختها كان هناك وفضلت هنا سرحانه وكان حسين واقف يبص عليها وحس انها وحيده اوي واتمنى يا خدها في حضنه ويقولها انه جنبها ومش هيبعد عنها ابدا بس قرر انه يديها فرصه تفكر براحتها من غير اي ضغط منه ..............................
الصبح هنا فطرت الولدين وعملت اكل وخدته المستشفى لاختها واطمنت عليها وعلى البيبي وعرفت انها هتروح انهارده وراحت وصلتهم البيت وطلعت معاهم وشافت لو محتاجين حاجه وجهزت اكل وحطته ف التلاجه عشان مامتها متتعبش وبالليل روحت هي وحماده عشان المدرسه الصبح .
تاني يوم هنا كانت مكسوفه تخرج من باب الشقه وتشوف حسين ففضلت تأخر نفسها لغاية ما شافته نزل من العين السحريه بس وهو نازل بص ناحية باب شقتها بصه معرفتش تفسرها وبعد شويه نزلت وركبت عربيتها وراحت المدرسه و كملت يومها عادي وفضلت كده اسبوع لغاية ما مامتها رجعت البيت وكمان مامت حسين جت من اسكندريه..................................