بعد الفرح

 

 

الحلقة السادسة

 

 

صحيت مي يوم السبت الساعه 6 صلت وحضرت الفطار وساندويتشات ليها ولحسام وابتدت تلبس وصحت حسام:
مي:حسام يلا يا حبيبي هنتأخر عالشغل
حسام:سيبيني شويه كمان
مي:يلا بقى بلاش كسل
حسام :طيب طلعيلي غيار
مي:كل حاجه جاهزه في الحمام
قام حسام خد شاور وحلق دقنه ولبس طقم شيك وفطر مع مي وقالها:
حسام:غيري البلوره ده ضيقه اوي
مي:ده جديده وشكلها جميل
حسام:شكلها جميل تلبسيها في البيت, وكمان لفي الطرحه عادي بلاش اللفه ده
مي:يا حسام انا عروسه
حسام:بصي يا حبيبتي انا بحبك وبغير عليكي
مي:حاضر يا حبيبي
حسام:انا هنزل اسخن العربيه عقبال ما تلمي السفره
مي:طيب
ودخلت مي الاطباق المطبخ وغسلتها ونزلت تركب مع حسام واول ما ركبت شمت ريحة البيرفيوم بتاع حسام مالي العربيه فقالت:
مي:الله ايه البيرفيوم الحلو ده
حسام:مش عريس , ايه ده انت حاطه بيرفيوم؟
مي:انا حاطه على الطرحه بس عشان لما صاحباتي يسلموا عليه
حسام:بصي يا مي ده آخر مره تحطي بيرفيوم في الشارع حطي في البيت زي ما انتي عايزه
مي:حاضر (وبعدين بقى انا مش متعوده حد يتحكم فيه بالشكل ده )
حسام( عايزه الناس تتفرج عليها متجوزه طرطور اصلها بس على مين؟ )
وصلوا الشغل وكل الشركه اتلمت عليهم وباركتلهم واصحاب حسام جمعوا مبلغ في ظرف نقطه لحسام واصحاب مي برده وكل واحد قعد يشتغل والساعه اربعه عدى حسام على مي في المكتب عشان يروحوا سوا لقي احمد زميلهم بيباركلها وهي بتضحك:
حسام:مش يلا بينا يا مي
احمد:مبروك يا عريس
حسام:الله يبارك فيك عقبالك
مي:انا جاهزه ,عن اذنك يا احمد
احمد:اتفضلي
وخرج حسام ومي من الشركه و اول ما ركبوا العربيه قالها:
حسام:كان بيقولك ايه؟
مي:هو مين؟
حسام:احمد يا ست هانم
مي:كان بيباركلي
حسام:طيب مفيش داعي تتكلمي مع اي واحد من زمايلنا غير في الشغل
مي:ايه يا حسام دول زمايلي بقالهم سنين
حسام:وانا جوزك يا مي
مي:انت بتغير عليه يا حبيبي
حسام:ايوه يا مي
مي:طب ممكن متزعلش
حسام:خلاص بس يا ريت متتكررش تاني
مي:من عينيه
وصلوا البيت ودخلت مي تغير هدومها ولبست شورت قصير ابيض وعليه تيشيرت احمر وسرحت شعرها وحطت ميك اب خفيف
اما حسام قلع هدومه وفضل قاعد بالبوكسر والفانله وغسل ايديه بميه بس فمي استغربت جدا انه مخدش شاور بس مرضيتش تعلق وقالها:
حسام:انا هروح انام شويه عقبال ما تحضري الغدا
مي:طيب ( يا سلام ما احنا راجعين من نفس الشغل يعني تعبنا زي بعض هيحصل ايه لو ساعدتني مكنتش فاكراك كده............)
بعد نص ساعه جهزت مي السفره وحطت الاطباق والسلطه وراحت تصحي حسام:
مي:يلا يا حبيبي الغدا جاهز
حسام:طيب
وقام وهو شعره منكوش وبيهرش في بطنه وقعد على السفره وابتدى ياكل وقالها:
حسام:تسلم ايدك يا حبيبتي بس السلطه الملح فيها زياده شويه
مي:معلش المره الجايه هقلله (ده انت بارد برود مش ممكن)
بعد ما اكل حسام قام وغسل ايده وقالها:
حسام:يا ريت تعمليلي كوباية شاي من ايديكي الحلوين
مي:حاضر
وابتدت مي تلم الاطباق ومسحت السفره وعملت المواعين وحضرت الشاي بس حست بالدموع بتنزل منها حست ان حسام مش بيساعدها خالص ومش حاسس انها بتتعب في الشغل زيه بس مسكت نفسها وراحت تطلع الشاي ودخلت الانتريه لقيت حسام نايم عالكنبه وبيشخر:
مي:حسام انت نمت تاني؟
حسام:لا انا صاحي اهوه
مي:طيب يلا عشان تشرب الشاي
حسام:تسلم ايدك يا حبيبتي
مي قعدت تشرب الشاي وتتفرج على التليفزيون بس حست ان ظهرها واجعها جدا وعايزه تنام (اصلها في بيت مامتها كانت بترجع من الشغل تنام مش تحضر الاكل وتعمل المواعين هاااااااا كانت ايام.
قرب منها حسام وقالها:
حسام:تعرفي وحشتيني جدا
مي:وانت كمان
حسام:آه مش اصحابي جمعولي مبلغ هدية الجواز
مي:وانا كمان
حسام:انا جمعولي 600 جنيه وانتي؟
مي:800جنيه
حسام: كويس جدا كده ممكن نشتري كومبيوتر في البيت مع الفلوس التانيه
مي:بس احنا ناقصنا حاجات اهم من الكومبيوتر
حسام:حاجات ايه؟
مي:انا نفسي نعمل اوضة اطفال
حسام:مش لما ربنا يرزقنا الاول نبقى نفكر
مي:بس ده حاجه مهمه
حسام:بصي يا مي احنا نفكر مع بعض بس الرأي اللي هيمشي هو رأيي انا
مي:يعني ايه؟ انا رأيي مش مهم
حسام:لا مش قصدي كده بس انا الراجل وكلامي هوه اللي لازم يمشي
مي:طيب وتكييف اوضة النوم
حسام:هنأجله شويه
مي:بس الاوضه حر جدا
حسام:ممكن بعدين نجيبه بالتقسيط
مي:يعني انت هتعمل ايه بالفلوس؟
حسام:هركب تكييف في العربيه واجيب الكمبيوتر
مي سكتت بس كانت عايزه تسوط في وشه من كتر الغيظ وقالت لنفسها متعمليش مشاكل من اولها وابقي اقنعيه براحه واكيد هيقتنع....................
حسام:ما تيجي اقولك كلمه سر جوه
مي:دلوقتي ؟
حسام: آه انت واحشاني موووووت
مي:طيب يلا
ودخلوا اوضة النوم وحسام حط بيرفيوم من غير ما يستحمى وقرب من مي بس هي شمت ريحة عرق مع البيرفيوم فادايقت ومرضيتش تضايقه
.................................................. .................................................. .................................
وبعد ساعه قام حسام خد شاور ولبس طقم شيك جدا وحط بيرفيوم جامد وقالها:
حسام:انا نازل القهوه ساعه وهآجي مش عايزه حاجه من تحت؟
مي:انت هتسيبني لوحدي؟
حسام:معلش يا حبيبتي لازم اشرب شيشه
مي:طب ما تشتري واحده في البيت
حسام:لا في القهوه ليها طعم مختلف يلا سلام
مي:مع السلامه
قامت مي استحمت وصلت ووضبت الشقه وجهزت الغدا بتاع بكره ونامت نوم عميق من كتر التعب بس قبل ما تنام قالت لنفسها لازم احاول اغير حسام عشان كده الحياه هتكون صعبه اوي............................................... .......................

يا ترى مي هتعرف تغير حسام؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟