الثلاثاء، 24 أبريل 2012

آنسة كومبيوتر

 

 

الحلقة الرابعة
فات اسبوع من الدراسه وعبير كل يوم بتحضر محاضراتها وتقضي الوقت الفاضي مع صفاء وهدى ومقابلتش احمد طول الاسبوع و جه يوم الخميس اللي عبير بتروح فيه النادي مع صفاء و كانت هناك الساعه 6 و لبست جيب جينز طويله وواسعه وعليها بلوزه بيضا طويله وشوز ابيض وسابت شعرها و حطت فيه توكه و خدت معاها اللاب توب و راحت قعدت على ترابيزه تستنى صفاء وفتحت اللاب توب تقرا قصه لاحسان عبد القدوس وكانت مركزه اوي...................

كان موجود عالترابيزه اللي جنبها عمر و شلته وهما موجودين يوميا فالنادي ودايما بيفضلوا يتريقوا على عبير وشكلها وقعدوا يتكلموا عليها:
عمر:البنت ده مش ممكن فعلا آنسه كومبيوتر
اسماعيل:يا عم فكك منها ده معقده
عمر:بس شكلها عاقله اوي وانا عمري ما عرفت بنت عاقله
محمد:عاقله ايه يا عم ؟ ده معقده
عمر:بقولكوا ايه .. ما تيجوا نقعد معاها
اسماعيل:يا ماما ده ممكن تاكلنا
محمد:انا مش عارف انت شاغل نفسك بيها ليه؟
عمر:عادي اهو الواحد بيتسلى
اسماعيل: ورح لوحدك يا عمر انا مليش في النوع ده وبعدين كوكي جايه كمان شويه
محمد وهو بيهزر:طب اوعى صاحبتك تلاقيك قاعد معاها تغير عليك ولا حاجه
عمر:لا متقلقش مظنش منه تغير من آنسه كومبيوتر

وقام عمر وسحب كرسي وقعد مع عبير اللي بصتله من تحت النظاره وقالتله:
عبير:افندم
عمر:ايه يا عبوره جاي اسلم عليكي
عبير:ايه عبوره ده ؟؟؟ و تسلم عليه بصفتك ايه؟
عمر:ايه يا عبوره ده احنا مع بعض في النادي من واحنا في الKG
عبير:وده كفايه انك تقعد معايا ؟
عمر:انا حبيت اسلم عليكي بس
عبير رفعت النظاره:الله يسلمك ممكن تقوم بقى تروح لأصحابك
عمر و هو متغاظ منها:طيب براحتك


في الوقت ده كان احمد داخل النادي هو ايمان عشان هيتغدوا مع باباهم ومامتهم فبص احمد لقي عبير بتكلم عمر وشكلها مدايق فقرب عليهم هو وايمان:
احمد: ازيك يا عبير؟ اخبارك ايه يا عمر؟
عمر:احمد حمدلله على السلامه رجعت امتى؟
احمد:من اسبوعين تقريبا
عمر:طيب تعالى اقعد معانا الشله كلها هنا
احمد:طيب هتغدى مع بابا وماما واجيلكم
ايمان:ازيك يا عبير
عبير:الحمد لله
ايمان:اخبارك ايه وفين صفاء؟
عبير:انا مستنياها
ايمان:طيب هتغدى وآجي اقعد معاكوا
عبير:اوكيه
احمد:عامله ايه في الدراسه يا عبير؟
عبير:الحمد لله
عمر استأذن وراح لاصحابه واحمد وايمان راحوا يتغدوا و صفاء وصلت:
صفاء:ازيك يا عبير, معلش مكنتش لاقيه تاكسي خالص
عبير:مش مشكله
صفاء:ايمان ده اللي كانت واقفه معاكي؟
عبير:ايوه
صفاء:و مين القمر اللي معاها ده ؟ اوعي تقولي صاحبها
عبير:لا يا حشريه ده اخوها
صفاء وهي بتهزر:هو مرتبط
عبير:وانا هعرف منين
صفاء خدت بالها من عمر وشلته:يووووه الولاد دول لاجئين هنا علطول؟
عبير:بس بقى ده عمر جه قعد جنبي قال ايه بيسلم عليا
صفاء:و انتي عملتي ايه؟
عبير:هعمل ايه يعني؟ كسفته طبعا
صفاء:برافو عليكي

فضلت صفاء وعبير يتمشوا شويه وبعدين راحوا قعدوا عالبيسين يتكلموا فشافهم احمد وايمان وراحولهم:
ايمان:انتوا فين انا بدور عليكم
صفاء:ازيك يا ايمان
ايمان:اعرفك باحمد اخويا
صفاء وهي بتبتسم:اهلا يا احمد
احمد:اهلا بيكي
صفاء:انت بتدرس؟
ايمان وهي بتضحك: هههههههه ده اتخرج من زماااااااااااان
احمد:مش زمان اوي يعني
صفاء:يعني بتشتغل؟
احمد:ايوه انا صيدلي في شركة ادويه
ايمان:مين يجي معايا اشتر بيبسي؟
صفاء:انا طبعا ده انا عطشانه موت, عبير اجيبلك معايا؟
عبير:لا شكرا
ومشيوا صفاء وايمان وفضل احمد قاعد مع عبير:
احمد:ها اتعلمتي الحروف العبري ولا لسه؟
عبير:ايوه ابتدينا نحفظها
احمد:يعني تعرفي تكتبيلي اسمي بالعبري؟
عبير:ايوه
احمد:طيب وريني بيبقى شكله ازاي؟
و كتبت عبير كلمة احمد بالعبري:
احمد ضحك:شكل الحروف غريب اوي
عبير:فعلا معاك حق
احمد:انتي بتقري ايه عاللاب توب؟
عبير:قصه لاحسان عبد القدوس
احمد:تعرفي انا قريت اغلبية قصصه
عبير وعينيها بتلمع:بجد
احمد:و كمان عندي قصص ليه في المكتبه بتاعتي
عبير:ياه اول مره اقابل حد بيحبه زي من الجيل بتاعي
احمد:بتقري قصة ايه؟
عبير:الرصاصه لا تزال في جيبي
احمد:حلوه اوي
عبير:انت بتحب قصصه الطويله ولا المجموعات القصصيه؟
احمد:بخب المجموعه القصصيه بحس فيها بمتعه اكبر وافكار مختلفه
عبير:وانا كمان

ساره زميلة احمد في الشغل كانت مو جوده فالنادي وشافته قاعد مع عبير فراحت تسلم عليه:
ساره:احمد ايه الصدفه الحلوه ده؟
احمد:اهلا يا ساره, انتي مشتركه فالنادي معانا؟
ساره:لا انا جايه مع واحده صاحبتي, ده اختك؟
احمد:لا ده عبير جارتي ومعايا فالنادي
ساره بصت لعبير من فوق لتحت وقالت:اهلا
عبير بصتلها جامد:اهلا بيكي
احمد:ما تقعدي يا ساره
ساره:لا مره تانيه اشوفك فالشركه
احمد:اوكيه
ساره:باي
احمد:باي
عبير:هي بتشتغل معاك؟
احمد:ايوه معايا في نفس المكتب
عبير:آآآآآآآه
صفاء وايمان رجعوا قعدوا معاهم واحمد استأذن عشان يروح لاصحابه وفضلوا البنات يتكلموا مع بعض عن الدراسه ............
احمد راح قعد مع عمر واصحابه وبعد ما سلموا عليه:
عمر:انت تعرف آنسه كومبيوتر منين؟
احمد:مين؟
محمد وهو بيضحك:آنسه كومبيوتر حد ميعرفهاش ده اشهر من النار عالعلم
احمد:لا بجد تقصدوا مين؟
اسماعيل:عبير عادل اللي كنت واقف معاها
احمد:وليه بتسموها كده
عمر:ده مبتسيبش الكومبيوتر من ايديها وكمان مبتكلمش اي ولد
محمد:يعني من الآخر معقده
احمد:ده جارتي في العماره و اعرفها من زمان
عمر:احمد يعرف بنات بالشكل ده؟؟؟؟؟؟؟؟؟؟
احمد:الشكل مش كل حاجه ده بنت محترمه ومثقفه اوي
محمد:بس النوع ده انقرض يا ابني
احمد:يا ريت كل البنات يبقوا كده
عمر:طيب يا عاقل احكيلي اخبار دبي وبنات دبي ايه؟
و فضلوا يتكلموا عن دبي وشغلهم و في الوقت ده كانت عبيرو ايمان وصفاء خرجوا من النادي عشان صفاء اخوها هيجي ياخدها و ارحوا يوصلوها..............



ليست هناك تعليقات:

إرسال تعليق