بعد الفرح

 

الحلقة الثانية عشر

 

 

فات اسبوع كمان وعدى عادي بنفس النظام اللي عاملاه مي ويوم الخميس بعد ما خلصت تنظيف الشقه جه حسام وقالها:
حسام:اعملي حسابك هنروح نبات عند ماما انهارده
مي:نبات؟
حسام:آه اصلها عازمانا نقضي خميس وجمعه معاها
مي:بس انا لسه مخلصه تنظيف الشقه دلوقتي
حسام:خليكي براحتك لسه بدري
مي ادايقت اوي كان نفسها تنام وتريح يوم الجمعه بس طبعا مقدرتش تقول لحسام عشان ميزعلش وحضرت نفسها وجهزت هدوم ليها ولحسام بس كانت مدايقه عشان اخو حسام اللي لسه طالب هيكون موجود وهي هتفضل بالحجاب طول اليوم
وصل حسام ومي عند مامته الساعه 8 وبعد ما سلموا على مامته واخوه قالت مامت حسام:
ام حسام:هروح احضر العشا
حسام:اقعدي انتي يا ماما مي هتحضره
ام حسام:يا حبيبي مي لسه عروسه
مي:لا يا طنط انا هحضر العشا
دخلت مي المطبخ وابتدت تعمل ساندويتشات وحضرت الشاي بلبن وخرجت بالصينيه وقدمت العشا وفضلوا سهرانين ادام التليفزيون والساعه 10 ابتدت مي تتاوب من كتر التعب فمامت حسام قالت:
ام حسام:قومي نامي يا مي انتي صحيتي بدري انهارده
مي:طيب تصبحوا على خير يا جماعه
ودخلت مي اوضة حسام وغيرت هدومها ولبست بيجاما جميله ودخلت السرير ونامت علطول بس بعد شويه الباب خبط فقامت مي فتحت لقيت حماتها بتقولها:
ام حسام:معلش يا مي هاتيلي ملايه من الدولاب عشان افرش لعمر ينام بره
مي:حاضر يا طنط
ودخلت مي تنام تاني وبعد شويه حست بحسام دخل الاوضه وغير وجه عالسرير وقالها:
حسام:انت نمتي؟
مي:آه نمت
حسام:مش هتقعدي معايا؟
مي:حسام لاحظ ان اخوك نايم بره الاوضه ومينفعش خالص
حسام: وفيها ايه؟
مي:ايه يا حسام ميصحش
حسام:طيب براحتك انا هخرج شويه
مي:تخرج فين دلوقتي؟
حسام:هروح القهوه
مي:كل يوم قهوه كل يوم قهوه
حسام:بقولك ايه انا حر اعمل اللي انا عايزه
مي:لا مش حر انت بقيت متجوز وبعدين انت جايبني عند مامتك عشان تخرج وتسيبني
حسام:وطي صوتك ,انا نازل
مي:متنزلش يا حسام
حسام:يعني هتعملي ايه؟
مي:بقولك مش هتنزل انا زهقت من مرواحك القهوه
حسام:انتي عايزه تتحكمي فيه ولا ايه؟
مي:يا حسام انا من حقي عليك انك متسبنيش لما اكون محتاجالك
حسام:مش انتي تعبانه؟
مي:يعني لما اكون تعبانه تسيبني وتنزل تخرج؟
حسام:بقولك ايه انا نازل
ولبس وخرج وفضلت مي تعيط من كتر احساسها ان حسام مش بيفكر غير في نفسه وبس وصعب عليها نفسها اوي واكتر حاجه دايقتها انها لو كانت عملت معاه علاقه كان برده هينزل ويسيبها لوحدها وفضلت تعيط لغاية ما نامت...................
الصبح صحيت مي على صوت الراديو عالي وسمعت صوت حماتها وعمر بره الاوضه فلبست عبايه وطرحه وخرجت صبحت عليهم ودخلت الحمام وبعدين دخلت المطبخ تحضر الفطار مع حماتها فقالت:
ام حسام:مالك يا مي؟
مي:مفيش يا طنط
ام حسام:انت زعلانه مع حسام؟
مي:لا ابدا
ام حسام :اصله خرج بالليل ورجع نام على الكنبه
مي:اصله بيحب يقابل اصحابه يوم الخميس ويمكن محبش يصحيني عشان كنت تعبانه شويه
ام حسام:ها في حاجه جايه في السكه؟
مي:والله مش عارفه يا طنط
ام حسام :ربنا يرزقكم يا بنتي
مي:ان شاء الله
وابتدت مي تحضر السفره وام حسام نادت على حسام وعمر وقعدوا كلهم يفطروا مع بعض وقامت مي عملت الشاي وغسلت الاطباق وفضلت متتكلمش مع حسام
وشغلت نفسها في المطبخ وهي لوحدها جه حسام عشان يشرب فقالها:
حسام:بتعملي ايه ؟
مي:بغسل الاطباق
حسام:طيب كفايه وتعالي اقعدي معانا بره
مي:لا لما اخلص وبعدين لسه هحضر الغدا
حسام:لأ انا هشتري سمك جاهز
مي:طيب انا هخلص و آجي
وخرجت مي وقعدت معاهم وبعد كده حسام قالها:
حسام:يلا يا مي البسي عشان نروح نشتري السمك
مي:حاضر
ام حسام:خليك يا حبيبي واعملكوا غدا في البيت
حسام:لا يا ماما عشان متتعبيش
وخرج مي وحسام عشان يشتروا السمك وفي الطريق وقف حسام ادام كافيه وقالها انزلي هنقعد هنا شويه ونزلت مي ودخلوا وقعدوا وقالها:
حسام:ممكن اعرف مالك؟
مي:مفيش حاجه
حسام:قوليلي يا مي في ايه؟
مي:انا حاسه اني وحيده يا حسام وحيده وجوزي جنبي
حسام:وحيده وانتي معايا
مي:بص يا حسام احنا مبقالناش كام شهر متجوزين بس حاسه اننا بقالنا سنين
حسام:كل ده عشان بروح القهوه
مي:ده جزء من المشكله لكن انت في البيت علطول نايم عالكنبه ادام التليفزيون ومش بتساعدني في اي حاجه مع اننا بنشتغل نفس الشغل ومش بتفكر تسألني اذا كنت محتاجه حاجه ولا لأ؟ انت بتاخد بس يا حسام ومش بتعرف تدي اي حاجه وقعدت مي تعيط....................
حسام:يااااااااااااااه كل ده جواكي
مي:انا حاولت اتأقلم على الحاجات ده بس مقدرتش
حسام:وليه مش بتقوليلي؟
مي:الاهتمام مش بيطلب يا حسام ., انت عمرك ما طلبت مني اهتم بيك عشان انا بحاول مقصرش معاك
حسام:طيب ايه رأيك نبدأ صفحه جديده؟
مي:موافقه طبعا بس يا ريت تهتم بيه يا حسام
حسام:طيب يلا بينا نشتري السمك ونرجعلهم نتغدى وبعد كده نروح بيتنا علطول
مي:ماشي يلا بينا
ومشيوا وهما فرحانين عشان كل واحد فيهم هيحاول يرضي التاني......................................