بعد الفرح

 

الحلقة السادسة عشر

 

رجعت مي بيتها بعد ما قعدت اسبوعين عند مامتها وطبعا كانت لسه تعبانه خصوصا ان آدم مش بينام طول الليل بس بيعيط وقررت مي هي وحسام انهم يعملوا عقيقة آدم في شقتهم يوم الجمعه وجابت مي شغاله تنضفلها الشقه يوم الخميس ويوم الجمعه اتفق حسام مع مطعم يجيب الاكل جاهز واستعدت مي لاستقبال الضيوف لبست عبايه لونها اخضر فاتح ومطرزه وآدم لبس بدله لبني فاتح ومامت مي جت بدري عشان تساعدها وابتدى الناس يوصلوا ومي كانت تعبانه وآدم عمال يعيط من الحر وكل شويه تدخل مي الاوضه ترضعه ومرضيش ينام خالص وبعد كده مي ادت آدم لمامتها وقعدت شويه مع قرايب حسام وفي الوقت ده جت هاله ومامتها وكانت هاله لابسه جينز ضيق وبلوزه طويله ولافه الطرحه بطريقه جديده ومي حست انها تخينه خالص وسلمت مي عليها وادتها شنطة هدايا فيها لبس للبيبي ومي شكرتها , وراحت هاله تسلم على حسام وقالتله:
هاله:مبروك يا حسام
حسام:الله يبارك فيكي
هاله:بس انت تخنت خالص
حسام: اصل اكل مي لا يقاوم هههههههههه
هاله:بس كده كرشك هيزيد وانت لسه صغير
حسام:للدرجه ده
هاله:ايوه طبعا اكتر حاجه بتبقى وحشه في الراجل كرشه
حسام:طيب هشوف الموضوع ده
هاله:لازم تروح جيم
حسام:ان شاء الله
ومي كانت سامعه الكلام ومتغاظه وقررت انها بكره هتروح للكوافير تعمل تغيير شامل في شكلها عشان نفسيتها تعبانه من شكلها وجسمها.................
ووصل الاكل وبعد ما الناس كلوا ادوا لمي فلوس للبيبي وبالليل كلهم روحوا وفضلت مي ومامتها يلموا الشقه ومي تعبت خالص وآدم بيعيط وحسام مش عارف يسكته فقالها:
حسام:مي من فضلك خدي آدم عشان هدخل انام بكره عندي شغل بدري
مي:متخليك ماسكه شويه عقبال ما اخلص الشقه
حسام:انا تعبت انهارده وعايز انام
ام مي:هاته يا بني وروح انت نام تصبح على خير
حسام:تصبحوا على خير
وقعدت مي تعيط عشان حست ان حسام مش مقدر تعبها ولا بيساعدها خالص وآدم مش بيسكت خالص ومامتها قالتلها ادخلي خدي حمام وانا هسكته ودخلت مي الحمام وفتحت الميه الدافيه وفضلت تعيط من شكل بطنها والجلد الزياده وحست انها مش حلوه خالص بس قالت لنفسها انها مش هتستسلم للاحساس ده وبعد ما خلصت حمام حطت كريمات ورشت بيرفيوم حلو ولبست بيجاما قطن شورت لونها بينك في ابيض وخرجت لقيت آدم نايم فقالت لمامتها:
مي:ماما خليكي بايته معايا انهارده
ام مي:ليه يا حبيبتي؟
مي:اصلي الصبح هنزل الكوافيره اللي تحت هعمل شعري ومش هعرف انزل بآدم لوحدي
ام مي:طيب يا حبيبتي , يلا بقى ادخلي نامي قبل ما الولد يصحى
ودخلت مي لقيت حسام نايم وبيشخر فبصتله وقالت (بكره هترجع من الشغل هتلاقي تغيير شااااااااااامل كاااااااااامل............................

ونامت مي عشان تستعد لبكره وآدم فضل نايم مع مامتها .