بتحبني ؟

 

الحلقة السابعة عشر

 

 

ابتدت الرحله وكانت ليلى مش عارفه تقول ايه ففضلت ساكته وكمان خالد غمض عينيه ورجع راسه لورا وليلى حطت السماعات وشغلت فيلم من قائمة الافلام الكلاسيكيه ابيض واسود وبعد نص ساعه حست ليلى ان راس خالد جنب راسها كان عايز يشوفها بتتفرج على ايه
ليلى شالت السماعه:في حاجه؟
خالد:ايه ده فيلم قديم؟
ليلى:ايوه اصلي بحب الافلام الكلاسيكيه
خالد:مكنتش متخيل انك كده
ليلى:ليه يعني؟
خالد:يعني بحسك بتحبي الحاجات الحديثه
ليلى:طبعا في الشغل لكن في الحياه شئ مختلف
خالد:وبتحبي ايه كمان؟
ليلى:يعني بحب الاغاني القديمه , وبحب التصوير , وبحب بابا وماما
خالد:ربنا يخليهملك
ليلى:وانت بتحب ايه؟
خالد:بحب شغلي , وطبعا ماما واختي
ليلى:اختك عندها كام سنه؟
خالد:مي عندها 19 سنه في كلية سياسه واقتصاد
ليلى:ربنا يخليهالك
خالد:بصي انا هنام شويه وما نقرب نوصل ابقي صحيني
ليلى:اوكيه
خالد اتغطى وحط مخده تحت راسه ونام وليلى كملت الفيلم بس لما خلص بصت على خالد لقيته نايم نوم عميق وحسته ملامحه اتغيرت وهو نايم زي ما يكون طفل صغير رقيق ورموشه كانت طويله بتلمس خده فحست انها بتحبه اوي ونفسها ينسى الماضي ويبدأ من جديد معاها و دعت ربنا انه يكون من نصيبها وتقدر تخليه سعيد و ................. نامت ليلى وهي بتحلم بخالد.
صحي خالد على صوت المضيفه جايبه المنيو بتاعت الاكل عشان يختار منها فبص خالد لقي ليلى نايمه فصحاها عشان تاكل:
خالد:ليلى ليلى
ليلى:اممممممممم
خالد:يلا عشان هناكل
فتحت ليلى عينيها وكان شعرها اتفرد وبصت لقيت خالد قريب منها اوي فبعدت بجسمه وقالت:
ليلى:هو انا بقالي كتير نايمه؟
خالد:مش عارف اصلي لسه صاحي, بس ايه النوم ده؟؟؟؟
ليلى:مش عارفه اصلي امبارح منمتش كويس
خالد:طيب كلي ونامي تاني لسه بدري
ليلى:لا خاص انا صحيت
وبعد ما كلوا طلبوا قهوه وفضلوا يتكلموا عن المعرض وهيعملوا ايه بالضبط وسمعوا صوت الكابتن بيعلن ان الطياره هتعمل هبوط في مطار دبي الدولي فربطوا حزام الطياره ولما وقفت قاموا وكل واحد فيهم شال اللاب توب بتاعه ومشيوا مع بعض عشان يخلصوا الاجراءات وخرجوا من المطار لقيوا ليموزين مستنيهم و راحوا عالفندق وكان فندق خمس نجوم ولقيت ليلى ان اوضتها ادام اوضة خالد واتفقوا يتقابلوا بعد ساعه في المطعم بتاع الفندق .
دخلت ليلى اوضتها وفضت الشنط وحضرت الهدوم اللي هتلبسها وبعد كده دخلت الحمام تاخد شاور وبعد ما خلصت نشفت شعرها بالمجفف ولبست جيب واسعه لونها ابيض وعليها بادي فضي ولبست صاندال فضي وحطت ميك اب رقيق ونزلت عشان تقابل خالد فالمطعم.
خالد بعد ما خد الشاور بتاعه لبس شورت جينز وعليه تيشيرت اصفر وشوز بني ونزل يستنى ليلى وبعد رع ساعه لقيها جايه ناحيته وكانت جميله جدا ولاحظ ان في شاب بيبص عليها جامد بس هي مخدتش بالها وقعدت عالترابيزه وقالت: ليلى:اتاخرت عليك؟
خالد:لا ابدا ده انتي اسرع واحده قابلتها
ليلى:طيب كويس
خالد:ها تتغدي ايه؟
ليلى:مش عارفه ؟
خالد:ايه رأيك ناكل سمك بيعملوه حلو اوي
ليلى:اوكيه نجرب
طلب خالد شوربة سي فود وطبق سمك سالمون ومعاه جمبري مشوي وبعد ما الجرسون مشي فضل خالد باصص لليلى:
ليلى:بتبصلي كده ليه؟
خالد:عادي بشوف ملامحك
ليلى وشها احمر:طيب ما انت بتشوفني فالشركه كل يوم
خالد:لا هنا شكلك مختلف وخصوصا لما وشك بيحمر زي دلوقتي
ليلى:...........................
الجرسون جاب الاكل وكانت ليلى هتشكره عشان انقذها من الكسوف اللي كانت فيه , وابتدوا ياكلوا ويتكلموا في مواضيع عامه وبعد ما خلصوا اكل خالد سألها:
خالد:تحبي تروحي فين انهارده؟
ليلى:مش عارفه انا مجتش دبي قبل كده
خالد:طيب يلا بينا هفرجك عل كذا مكان هيعجبوكي اوي
وخرجوا من الفندق وركبوا تاكسي.......................