بعد الفرح

 

 

الحلقة التاسعة

 

ابتدت مامت مي تقولها تعمل ايه:
ام مي:بصي يا مي انا طول عمري كنت بآجي على نفسي في كل حاجه واقول عشان المركب تمشي بس من خبرتي في الدنيا مفيش راجل بيشكر مراته ولا يحسسها انها تعبت عشانه مهما عملت يعني انتي اهوه حسام اخد الفلوس اللي جمعتوها كلها عشان يجيب حاجات لنفسه هو الراجل كده اناني ولو ما اخدتيش اللي عايزاه بنفسك عمره ما هيديكي حاجه ويفضل مقتنع انه مادام بتاكلي وتشربي يبقى كده مش ناقصك حاجه حتى لو بتشتغلي وده اغلب الرجاله بيعملوه بيبقوا حاسين ان مرتب مراتهم بتاعهم عشان قال ايه بتاخد من وقت البيت فلازم تشارك بمرتبها في المصاريف وده كله مش في الشرع اصلا الشرع بيقول ان الست ليها ذمه ماليه لوحدها انها المفروض تقعد في البيت معززه مكرمه والراجل لو قادر يجيبلها خدامه تعمل شغل البيت وحتى لو بترضع المفروض الراجل يدفعلها اجر عن الرضاعه وتعرفي كمان ان المهر المفروض العروسه تاخده ليها ومحدش ياخده منها ولا حتى ابوها بس للأسف محدش بينفذ احكام الشرع في الزمن اللي احنا فيه
مي: يااااااااه يعني الدين بتاعنا بيكرم الست كده والرجاله بتبهدلها
ام مي:عشان كده انا هقولك كام حاجه تنفذيهم
مي:قولي يا ماما
ام مي:اولا انتي بتشتغلي زي جوزك بالضبط يبقى اما يساعدك في البيت اما تسيبي الشغل وهو يصرف عالبيت
مي:بس العيشه صعبه يا ماما
ام مي:انا اصلا مش عايزاكي تسيبي الشغل ابدا بس ده اللي هتقوليه لجوزك
مي:وايه كمان؟
ام مي:موضوع العزومات ده مش وقته انت لسه عروسه
مي:يعني اعمل ايه؟
ام مي:انا خلاص هحضرلك الاكل كله بس بعد كده هتقوليله انا تعبانه طول الاسبوع ولو عايز يعزم اهله يبقى يجيب اكل جاهز
مي:وهيرضى؟
ام مي:بصي يا حبيبتي الراجل لو حس انك متردده وانت بتطلبي الحاجه مش هيوافق لكن لو طلبتي وانت واثقه من نفسك هيخاف يرفض
مي:وايه كمان؟
ام مي:امه طول ما هي هنا تبقى ضيفه بس مش معنى كده انك تكوني خدامه يعني تحضري الفطار والغدا والعشا وحاجه كمان لازم تبطل تنام على سريرك
مي:يعني اقولها ايه؟
ام مي:قولي انك هتنامي او هتنضفي الاوضه
مي:وكمان حسام بيروح القهوه كتير وانا بدايق
ام مي:ده بقى شطارتك انت لازم تخليه يحب قعدة البيت اكتر من القهوه ولو ان ده هياخد منك وقت
مي:اما اشوف
ام مي:وبكره وانتي راجعه من الشغل في العربيه اعملي نفسك نايمه طول الطريق واول ما تدخلي الشقه جري عالسرير وهو يسخن الاكل ليه ولامه
مي:هيرضى؟
ام مي:لا متخافيش المهم متضغطيش على نفسك عشان الضغط ده هيخليكي في يوم تنفجري فيه وده اصعب حاجه بين اتنين متجوزين لحظة الانفجار
مي:هحاول يا ماما
ام مي:آخر حاجه قبل ما انسى
مي:خير ؟
ام مي:مرتبك مش كله للبيت لازم تخلي جزء ليكي عشان لو احتجتي حاجه ولازم يكون دايما معاكي فلوس على جنب مش كله للبيت ولو نفسك في حاجه يقولك بعدين
مي:كل ده يحصل بعد شهر جواز؟
ام مي:ولسه ياما هتشوفي في الدنيا ده المهم لازم تخليه يساعدك في كل حاجه وعلطول حسسيه انك تعبانه تعرفي انا عمري ما بينت لابوكي اني تعبانه عشان ميحسش اني مقصره بس للاسف اتعود اني علطول صحتي كويسه فلما بتعب بيزعل عشان بيحس اني مقصره مع اني بكون تعبانه جدا
مي:حتى بابا كده؟
ام مي بصت لبعيد وقالت:كل الرجاله كده بس الشاطره اللي تقدر تخلي جوزها يعملها كل اللي عايزاه من غير ما يحس انه بينفذ كلامها
مي:هحاول يا ماما
ام مي:اسيبك بقى وهكلمك بالليل اطمن عليكي
مي:لسه بدري
ام مي:لا يا حبيبتي انا اتاخرت
مي:طب اقعدي اتغدي معانا
ام مي:لا كفايه اللي عندك ههههههههههه
مي:مع السلامه يا ما
ام مي:مع السلامه يا حبيبتي
واول ما مامت مي خرجت وباب الشقه اتقفل خرجت مامت حسام من الاوضه وقالت:
ام حسام:مين؟
مي:مفيش يا طنط ده ماما مشيت
ام حسام:مش كانت اتغدت معانا
مي:اصلها اتأخرت على بابا
حسام صحي وقال:
حسام:يا مي انا جعت خالص
مي:كل حاجه جاهزه تعالى لو سمحت حضر السفره معايا
حسام اتخض وقام وقف وقال:حاضر انا جاي اهوه
ووقف حسام يساعد مي وهي عماله تقوله طلع ده وده وهو رايح جاي وبيسمع الكلام وقعدوا يتغدوا وبعد الغدا ابتدت مي تلم الاطباق وقالت:
مي:حسام تعالى يا حبيبي اعملنا الشاي بايديك الحلوه عقبال ما اغسل المواعين
حسام:طيب
وبعد كده قعدوا في الانتريه كلهم يشربوا الشاي ومي كل شويه تقول:
مي:انت بتعمل شاي مضبوط اوي يا حبيبي
حسام: عشان تعرفي بس
مي:طبعا عارفه ههههههههههه
الساعه 8 مي قالت:انا هقوم انا بقى عشان عندي شغل بدري تصبحوا على خير
حسام:مش هتسهري معانا
مي:معلش يا حبيبي اصلي تعبانه
حسام:طيب انا جاي معاكي,عن اذنك يا ماما
ام حسام:اتفضل يا حبيبي
دخل حسام لقي مي بتغير هدومها ولبست قميص نوم اصف قصير ودخلت السرير ونامت فقالها:
حسام:مي انت تعبانه اوي ولا نص نص؟
مي:نص نص
راح حسام نط جنبها في السرير وناموا لغاية الصبح وسابوا مامت حسام سهرانه لوحدها تتفرج عالتليفزيون
الصبح قامت مي خدت شاور وحضرت الساندويتشات فحسام قالها:
حسام:مي من فضلك اعملي فطارلما وسيبيه عالسفره اصل ماما بتتكسف تاكل
مي:حاضر (امك بتتكسف؟ ده ممكن تاكلنا وهي قاعده )
وابتدت مي تغير معاملتها مع حسام وهنشوف هيحصل ايه