يوميات مدام عنايات

الحلقة الثامنة

قرر عبده انه مش هيقول لعنايات على المكالمة وهو هيحط حد لمنى بنفسه
اما منى بقى خلاص قررت انها لازم تخلي عبده يتعلق بيها بأي تمن وهي طبعا مش هتغلب عشان حست ان عبده خاااام خالص وملوش تجارب .
الصبح وصل عبده الشركه واول ما دخل المكتب لقى منى لوحدها وعماله تعيط جامد جدا فصعبت عليه اوي وسألها:
عبده :خير يا منى في ايه؟
منى وكانها اتفاجأت بوجوده :عبده انت وصلت انا آسفة انك شوفتني في الحاله دي
عبده :لا ابدا بس طمنيني مالك؟
منى : انا مش عايزة اشغلك بمشاكلي
عبده:لا لا متقوليش كده الناس لبعضيها خير؟
منى:لا ابدا اصل امبارح طليقي جه البيت عندنا وعايزنا نرجع لبعض
عبده : يا شيخة خضيتيني ده حاجه تخليكي تضحكي مش تعيطي
منى : اضحك على ايه اصلك متعرفش طليقي ده شكله ايه و لا كان بيعاملني ازاي؟
عبده :يا ستي يمكن عدك عنه الفترة ده غيره
منى: لو كل الناس اتغيرت هوه عمره ما هيتغير ده انسان فظيع
عبده :طب ما تتكلمي معاه وانت اكيد هتعرفي اذا كان اتغير ولا لأ؟
منى :وهتكلم معاه في ايه؟
عبده :يعني قولي كل اللي جواكي
منى : يعني انت شايف كده؟
عبده :اه طبعا
منى :طيب انا هكلمه ونتقابل انهارده بالليل
عبده : ايوة كده وابقي طمنيني عالاخبار
منى : اوكيه هكلمك بالليل
عبده حس انه بكده اداها فرصة تتصل بيه تاني وممكن عنايات تعرف فمعرفش يتصرف ازاي وقرر انه لما يروح البيت هيعمل الموبايل صامت ومش هيرد عليها وربنا يستر بقى وعنايات متخدش بالها
عنايات في البيت بتذاكر للولاد بعد الغدا وحست ان عبده مش طبيعي وكل شوية يبص في الموبايل وطبعا عنايات عندها احساس ان في حاجه حصلت انهارده فراحت عملت كوبايتين شاي وقعدت معاه في البلكونة وقالت :
عنايات :ها حبيبي ماله انهارده ؟؟
عبده :انا لا ابدا, انا كويس
عنايات:طيب اخبار الشغل ايه؟
عبده:اه بالحق احنا معزومين على فرح يوم الخميس
عنايات :بجد فرح مين؟
عبده : بنت مدير الشركه جهزي نفسك بقى
عنايات:لا انا مش عايزه اروح
عبده:ليه ياحبيبتي ده انت بتحبي الافراح اوي
عنايات :عادي اصلي معرفش حد وكلهم اصحابك انت
عبده : طيب يا حبيبتي اللي يريحك
(طبعا عنايات هتروح دي فرصتها اللي جت لغاية عندها بس هيه قالت كده عشان متأكده ان منى هتسأله مراتك هتيجي ولا لأ وهيه عايزة تفاجأ منى وتوريها اللي عمرها ما شافته وقالت لنفسها استعنى عالشقى بالله ........ )
الصبح اول ما عبده نزل عنايات جريت على التليفون واتصلت بهدى:
عنايات : صباح الخير يا هدى
هدى: صباح الخير ايه الاخبار؟
عنايات: اطلعيلي حالا
هدى:خير؟
عنايات :عندنا مهمة خطيرة لازم نحضرلها اسلحة ذرية
هدى : هي وصلت للاسلحة الذرية دقيقتين هكون عندك افتحي الباب
عنايات فتحت الباب لقيت هدى وصلت وهيه لابسه الاسدال على البيجاما فقعدت تضحك وتقولها:
عنايات:تموتي في المغامرات
هدى :امال اية ده احلى حاجه في الدنيا لما نحل المشاكل الغريبة اللي بنقابلها,ها ايه الخطة المره ده؟؟؟؟؟
عبده وصل الشغل لقي منى واقفة في الكافيتريا بتشرب نيسكافيه واول ما شافته :
منى:صباح الخير يا عبده
عبده :صباح الخير
منى : هتيجي الفرح يوم الخميس؟
عبده:ان شاء الله
منى: وهتجيب المدام والاولاد؟
عبده: لا للاسف عنايات مش هتقدر تيجي
منى:هيه مراتك اسمها عنايات؟؟؟؟
عبده :اه ,استغربتي كده ليه عشان اسم قديم؟
منى: يعني ,بس هوه حلو على فكرة
عبده : اصل باباها سماها على اسم جدتها
منى: طيب استأذنك انا بقى
عبده :اتفضلي
(وطبعا منى هتطير من الفرحة مادام اسمها عنايات تبقى بلدي وهقدر اخليه يتعلق بيه بسهوله وكانت سعيده جدا)
وقبل ما عبده يركب العربيه لقي منى بتنادي عليه:
منى :عبده
عبده: خير يا منى
منى : مسألتنيش يعني عملت ايه امبارح مع طليقي؟
عبده :اصل ماجتش فرصة ايه الاخبار؟
منى:لا خلاص الموضوع مش هينفع خالص مفيش نصيب
عبده : ربنا يعملك اللي فيه الخير ان شاء الله
منى:انت معندكش اخ ؟
عبده :اه عندي ليه؟
منى :عشان اروح اخطبه
عبده :ده لسه خريج جديد هههههههههه
منى : ما هوه انا قررت مش هلرتبط تاني غير بواحد زيك في كل حاجه
عبده وشه احمروقالها:طيب عن اذنك عشان انا اتأخرت عالبيت
منى وهي بتضحك:اتفضل
يوم الخميس الصبح عبده بيقول لعنايات:ابقي جهزيلي البدله السودا والكرافت الموف
عنايات :من عينيه يا حبيبي هترجع من الشغل تلاقي كل حاجه جاهزه ان شاء الله
عبده :متشكر يا حبيبتي
ونزل عبده الشغل وبدأت عنايات تنفيذ الخطة ...................
هكملكوا المرة اللي جايه ان شاء الله