الأحد، 22 أبريل 2012

يوميات مدام عنايات


الحلقة التاسعة

وقفنا لغاية ما عبده نزل الشغل وهوه فاكر ان عنايات مش هتروح الفرح معاه لكن عنايات كانت محضره نفسها للفرح ومستعده تنزل ارض المعركه وتواجه منى ,فبعد ما عبده نزل اتصلت بهدى وراحوا للكوافيرة ضبطت نفسها ورجعت البيت حضرت الغدا وجهزت بدلة عبده واول ما الولاد رجعوا من المدرسه خلصوا الواجب واتصلت بحماتها:
عنايات :الو ازي حضرتك يا طنط؟
ام عبده : ازيك يا عنايات وازي الولاد؟
عنايات :الحمد لله,هوه حضرتك خارجه انهارده؟
ام عبده :لا يا بنتي مش هخرج ,خير في حاجه؟
عنايات : لا ابدا اصلي عندي فرح مع عبده بالليل فممكن اجيبلك الولاد ؟
ام عبده :طبعا دول وحشوني اوي بس هاتيلهم السي دي بتاعت الكارتون اللي بيحبوها
عنايات: حاضر يا طنط ان شاء الله واحنا رايحين الفرح هنعدي الولاد عليكي
ام عبده: خلاص مستنياكوا
عنايات: ان شاء الله مع السلامه
ام عبده :مع السلامه
واول ما رجع عبده اتغدوا وشربوا الشاي وقالها:
عبده : جهزتيلي البدله عشان الفرح؟
عنايات : اه طبعا انا جهزت كل حاجه
عبده: طيب انا هروح انام عشان هسهر بالليل
عنايات : طيب يا حبيبي
وبدأت عنايات تجهز هدوم الولاد الحاجات اللي هيحتاجوها عند جدتهم ولبستهم وفتحت الكارتون ودخلت هي اوضتهم وبدأت تستعد......
وبعد حوالي ساعه صحي عبده ودخل يحلق وياخد حمام واول ما خرج كان بينشف وشه وبيبص لقى عنايات قاعده على الكرسي ولابسه ومستعده تروح الفرح فاستغرب جدا بس كمان اتفاجأ من شياكتها وحس انها انهارده فيها حاجه جديده
جمال غريب حتى عينيها بتلمع اوي:
عبده : ايه المفاجأه الحلوه دي؟ وايه الجمال ده كله؟
عنايات وقفت ولفت عشان يشوف الفستان من ورا وهيه بتضحك و قالت:
عنايات:انا فكرت تاني وقلت فرصة نخرج لوحدنا
عبده :ليه احنا مش هناخد الولاد معانا؟
عنايات: الولاد صحيوا بدري وانا كلمت مامتك وهيه مستنياهم
عبده: يعني هنبات لوحدنا انهارده (وهوه بيغمز لها وبيضحك)
عنايات : اه ,عشان تفكرني بليلة فرحنا لحسن نسيتها
عبده : انا ممكن افكرك دلوقتي لو تحبي وبلاش الفرح
عنايات:لا لا بالليل ههههههههههه
عبده : طي يا ستي انا هلبس وانتي جهزي الولاد
عنايات بصت في المرايه ورشت بيرفيوم guss عشان عبده بيحبه اوي ولبست طقم دهب ابيض وقالت لنفسها اما نشوف ست منى هتعمل ايه لما تشوفني مع عبده ................
اول ما وصلوا الفندق وقبل ما يدخلوا القاعة بخطوتين عنايات وقفت:
عنايات: ممكن تسناني ثواني هضبط الطرحه في الحمام مش هتأخر يا حبيبي
عبده : لا براحتك يا جميل انا هستناكي هنا (وقعد على كنبه قدام القاعه )
عنايات بقى دخلت الحمام وهيه متأكده ان منى هتيجي تسلم على عبده فقالت لما اعملها مفاجأه هههههههه
وفعلا كانت منى كل شوية تبص على باب القاعه مستنيه عبده يجي عشان تقعد معاه طول الفرح براحتها بعيد عن جو الشغل وخرجت تشوفوا وصل ولا لسه لقيته قاعد لوحده فراحت بسرعه تسلم عليه وكانت لابسه فستان احمر قصير فوق الركبه وفارده شعرها وحاطه ميك اب زياده بس كانت مزة وكل الرجاله بيبصولها باعجاب :
منى : مساء الخير يا عبده اتأخرت ليه ؟كنت لسه هتصل بيك
عبده : مساء النور اصل..........
وبص بعيد وعينيه كانت بتلمع فمنى بصت لقيت واحده خارجه من الحمام طويله وجسمها مضبوط ولابسه فستان موف ضيق من عند الصدر ونازل على واسع ومطرز من عند الصدر بتطريز اسود ولابسه طرحتين موف في اسود وميك اب هادي وبشرتها بيضا وعينيها واسعه وحاطه اي شادو موف واسود زي اللي بتعمله هيفاء وهبي ولابسه صندال كعب عالي وريحة البيرفيوم بتقرب معاها فقالت مين ده يا ترى؟؟؟؟؟
فراح عبده وقف ومسك ايديها وقالها تعالي يا حبيبتي اعرفك بمنى زميلتنا الجديدة
عنايات : اهلا وسهلا
منى : اهلا بيكي
عبده :اقدملك عنايات ..........مراتي
منى كان هيغمى عليها مكل خططها باضت ودخلوا مع بعض القاعه وكل الناس بتبص لعنايات ومنى وبيفكروا مين فيهم احلى؟
وقعدت عنايات ومنى على الترابيزة مع مرات احمد وقعدوا يتكلموا في كلام عام ومنى مش بتشيل عينيها من على عنايات وكان عبده واقف مع زمايله احمد وهشام وجه زميله اسماعيل: اسماعيل: يا جماعه انا لقيت عروسه بس مش عارف هي تبع العروسه ولا العريس؟
احمد : هيه فين ؟
اسماعيل :قاعده مع مراتك ع في نفس الترابيزة
احمد: ايوه يا عم قصدك منى دي زميلتنا الجديده في المكتب
اسماعيل:لا مش منى وهيه منى دي تنفع عروسه برده دي مش محجبة ومتحرره اوي
عبده وشه احمر جدا واستأذن وراح يقعد مع عنايات فاحمد قال:
احمد : ايه يا اسماعيل ده مرات عبده انت معندكش تمييز خالص؟
اسماعيل:والله مكنتش اعرف,انا هروح اعتذرله
احمد:يلا بينا الله يكسفك
وراح احمد واسماعيل وقعدوا معهم واسماعيل كان محرج وقال:
اسماعيل :انا آسف يا عبده والله مكنتش اعرف وبعدين احنا ممكن نحل المشكلة واخطب اختها ايه رأيك؟
عبده :حصل خير بس عنايات وحيده باباها ومامتها
اسماعيل : انا بكرر اسفي
منى :هوه فيه ايه؟بتتكلموا في ايه؟
احمد:لا ابدا اصل اسماعيل لقي عروسه وبعدين طلعت متجوزة هههههههههههه
منى : هيه فين ؟
احمد :قاعده جنب جوزها وحاطط ايده عليها لحسن حد ياخدها منه
منى بصت لقيته بيتكلم عن عنايات وحست انها متغاظه منها اوي ,وبدأت الناس ترقص سلو مع بعض فراح عبده مسك عنايات وقاموا يرقصوا واحمد ومراته واسماعيل طلب من منى الرقص فوافقت وكملوا الفرح لحد ما خلص
بس منى قررت انها هتغير اسلوبها مع عبده وحست انه هو ده الراجل اللي بتحلم بيه طول عمرها .............
هكملكوا المره اللي جايه ان شاء الله

ليست هناك تعليقات:

إرسال تعليق