زوجات غاضبات (6)

 

اتجوزت هاله وعادل جواز تقليدي بعد فترة خطوبه سنه كان فيه بينهم مشاكل بسيطه وكان دايما عادل بيقدر يحلها باسلوبه الهادي الرقيق ورغم ان هاله حست ان مشاعر عادل ناحيتها مش قويه قررت تكمل عشان كانت شايفه انه عريس مناسب من كل النواحي فشكله كويس ومن عيله ومستواه الاجتماعي والمادي كويس جدا
وابتدت هاله مشكلتها من يوم الدخله..................................
بعد ما هاله لبست القميص الابيض ودخلت اوضة النوم تستنى عادل لقيته اتاخر اوي فخرجت تشوفه فين لقيته نايم بره فصخته مرضيش يصحى وقالت يمكن تعبان
وسابته واستمر الوضع ده اسبوع وكل يوم تحاول هاله تتقرب من عادل وهو زي ما هوه بينام في اوضه تانيه وهاله فضلت تقنع نفسها انه يمكن يكون مكسوف منها فقررت تسيبه فتره براحته و لما مامتها سألتها عن اخبارها قالت ان كل حاجه كويسه وفات شهر وهاله خست خالص عشان حست انها مش مثيره في عين جوزها وعادل بيعاملها كويس وبيساعدها في كل حاجه ومهما حاولت هاله تقربله يهرب منها وبعد مرور فتره قررت هاله تكلمه بصراحه:
هاله:انا عايزه اكلمك في موضوع مهم
عادل:اتفضلي يا حبيبتي
هاله:هوه انا مش عاجباك؟
عادل:ليه بتقولي كده؟
هاله:انت مقربتليش من يوم ما اتجوزنا
عادل:اصلي مرهق شويه
هاله:بقالك شهرين مرهق
عادل:معلش يا حبيبتي
هاله:انا بقول اننا لازم نروح لدكتور عشان نطمن عليك
عادل:دكتور ليه انا كويس جدا
هاله:عشان خاطري يا عادل لازم نروح
وبعد الحاح من هاله وافق عادل وفعلا راحوا والدكتور قالهم ان عادل عنده ضعف جنسي شديد بس ممكن علاجه مع الوقت وابتدى عادل العلاج وكانت هاله بتشجعه وواقفه جنبه وفعلا ابتدى عادل يتحسن وحصلت اول علاقه بينهم بعد 6 شهور جواز وحملت هاله من اول مره...............................
وعشان كان حملها صعب محصلش بينهم اي علاقه طول فترة الحمل وطبعا بعد الولاده وجابت هاله ولد جميل وبعد ما البيبي تم تلات شهور ابتدت هاله تحس ان عادل وقف العلاج وابتدت معاه تاني لكن عادل رفض انه يكمل ورغم الحاح هاله انه رفض وابتدى يعاملها وحش وبقى عصبي جدا وغيور عليها لابعد درجه
وكل يوم تنام هاله وهي بتعيط عشان حست انها متجوزتش وانها عايشه مع عادل بس عشان تخدمه وتربي الولد وهي ابتدى شبابها يروح من كتر الجزن اللي هي حاسه بيه وفاتت سنين وهاله ساكته بس طبعا نظرات الرجاله ليها بتعذبها وحست انها بقت ضعيفه قدام اي راجل وابتدت تفكر في الطلاق بس خافت من كلام الناس خصوصا ان جوزها شكله قدام الناس زوج مثالي والناس كلها حاسدنها عليه بس محدش يصدق ان الراجل اللي كله صحه ده ضعيف مع مراته ولغاية انهارده هاله مش قادره تاخد القرار بالطلاق ولسه بتفكر..............................