مطلوب عريس فورا

الحلقة الثانية عشر

 

بالليل لبس ادهم بنطالون جباردين بني وعليه قميص بنص بكم لونه لبني فاتح وشوز بني جلد بني برباط وطبعا حط البيرفيوم الجميل بتاعه وخرجت مروه من الحمام لابسه بنطالون ضيق لونه اسود وبلوزه ساتان كات لونها نبيتي ومغطيه لغاية نص الفخد كده وليها حزام رفيع جلد اسود وشوز بكعب عالي اسود وفردت شعرها وحطه ميك اب للسهره وكان شكلها جميل جدا وادهم لما شافها كح الاول وقال:
ادهم:ها جاهزه؟
مروه:آه يلا بينا
ونزلوا مع بعض وركبوا العربيه وراحوا سينما سيتي ستارز ودخلوا فيلم اجنبي جديد وقعدوا جنب بعض وابتدى الفيلم ومتكلموش خالص ولما جت الاستراحه قاموا يشتروا حاجه يشربوها واصر ادهم انه يشتري فيشار كتير وشوكولاته عشان مروه وهما بيشتروا جه صوت من وراهم:ادهم... مش معقول
ادهم:ازيك يا ساره عامله ايه؟
بصت مروه لساره لقيت بنت شقرا وطويله ولابسه فستان قصير جدا وعندها كل حاجه كبييييييييره ومروه حست انها متغاظه وراحت مسكت دراع ادهم:
مروه:مش تعرفني
ادهم:ساره .... ودي مروه مراتي
ساره:ايه ده انت اتجوزت امتى؟
ادهم:لسه مكملتش تلت ايام
ساره:الف مبروك ( وبصت بصه خبث ) وقالت:
ساره: وبتعملوا ايه هنا بقى مش المفروض العرسان يقعدوا مع بعض هههههههههه
مروه وشها احمر من الكسوف والغيظ راح ادهم لف دراعه حوالين كتفها وقال:
ادهم:احنا لسه ادامنا العمر كله عن اذنك يا ساره
ساره :اتفضل
مروه:صاحبتك ده مستفزه جدا
ادهم:ده مش صاحبتي
مروه:آه ما هو واضح
ادهم:انا مش بكذب عليكي ده كانت زميلتي في الكليه
مروه:بس شكلها معجبه بيك اوي
ادهم:انا مقدرش امنع واحده انها تعجب بيه بس المهم انا بموت في مين؟؟؟؟؟؟؟؟؟؟ ومروه اتكسفت ودخلوا يكملوا الفيلم
وبعد السينما راحوا يسهروا في سفينه في النيل وكان فيها رقاصه وعشاء بوفيه مفتوح وفضلوا يتكلموا عن ايام طفولتهم ويضحكوا خصوصا ان ادهم كان شقي جدا وهو طفل ومروه مش مصدقه انه كان بيعمل كل الحاجات الفظيعه ده وقعدت عينيها تدمع وسكت ادهم وباصلها وقال:
ادهم:بحب ضحكتك اوي
مروه وهي لسه بتضحك:ليه بقى ؟
ادهم:مش عارف لما اعرف هقولك
وبعد كده اتعزفت موسيقى للرقص السلو وطلب منها ادهم انهم يرقصوا فوافقت من غير ما تفكر وقاموا يرقصوا على اغنية (i will alwayes love u)
وبعد الرقصه قعدوا يتعشوا ويكملوا كلام وفجأه بقت الساعه اربعه فمروه قالت:
مروه:تخيل ده اول مره في حياتي اسهر للوقت ده
ادهم:ليه؟
مروه:كنت مشغوله بالدراسه والشغل وكورسات الايطالي و مكنتش بحب الخروج زي باقي البنات و..............
ادهم:ايه يسكتي ليه؟
مروه:اصل ماما الله يرحمها كانت بتخاف عليه اوي وكانت علطول بتخوفني من الناس
ادهم:الله يرحمها
مروه:مش هنمشي بقى؟
ادهم:زي ما تحبي ,اتفضلي
وركبوا العربيه وشغل ادهم موسيقى هاديه وبعد شويه حس براس مروه على كتفه ولقيها نامت فسابها تنام واول ما وصلوا الدار باسها في راسها فمروه كملت نوم عادي راح صحاها بشويش خالص:
ادهم:مروه قومي احنا وصلنا
مروه راحت لفت دراعها حواليه وادهم وشه احمر وحاول يبعدها بس هي كانت ماسكه فيه جامد فقالها:
ادهم:مروه اصحي دلوقتي حالا انا بقولك اهوه
مروه:ايه في ايه وصحيت لقيت نفسها ماسكه فيه فاتكسفت وفضلت تعتذرله وهو بيضحك ويقولها:
ادهم:انا بصراحه خفت منك حسيت بعدم الامان معاكي
مروه:والله مكنش قصدي اضايقك انا آسفه
ادهم وهو لسه بيضحك:انت قلتي ان الجواز كده وكده يا ريت تفضلي فاكره
مروه:خلاص بقى انا غلطانه
ونزلوا وهي متعصبه وهو بيضحك عليها وكان نفسه يشيلها ويفضل حاضنها علطول بس هوه واخد قرار انه مش هيستعجلها خااااااالص................
وفات يومين وجه اليوم الاخير ليهم في مصر وراحوا يتغدوا عند بابا مروه قبل معاد السفر وجت مامت ادهم كمان وفضلوا طول الوقت يوصوهم انهم ياخدوا بالهم من بعض في ايطاليا وبعد الغدا حضروا الشنط وراح بابا مروه ومامت ادهم يوصلوهم المطار وبابا مروه قال لادهم بصوت واطي:
ابو مروه:مش هوصيك يا ادهم انت واخد اغلى حاجه في حياتي
ادهم:في عينيا يا عمي اطمن وخطتنا ماشيه زي ما خططنا
مروه:بتقولوا ايه؟
ادهم:باباكي بيوصيني عليكي
وسلم ادهم على مامته وهي عيطت وبابا مروه حضنها وعيط وودعوهم ودخل ادهم ومروه الصاله اللي هيسافروا منها ايطاليا................