يوميات مدام عنايات

 

الحلقة الخامسة

وصلنا لحد ما عنايات قررت انها لازم تشوف منى دي اللي حاطه عبده في دماغها وعشان عنايات عاقلة ومش متهورة متكلمتش مع عبده في الموضوع ده خالص خصوصا انه بيحكيلها كل حاجة من غير ما تسأله فقعدت مع هدى صاحبتها وفكروا ازاي عنايات تشوف منى من غير ما منى تشوفها عشان عنايات على اساس شكل منى هتتصرف والصبح بعد ما نزلت من الشقة خبطت على هدى
هدى : صباح الخير يا عنايات
عنايات : صباح الخير يا هدى ..ها جهزتي اللي قولتلك عليه؟؟؟
هدى : ومال متوترة كده ليه؟
عنايات :ده انا منمتش طول الليل هتجنن واشوف شكلها اية منى دي؟
هدى :طيب بس اقعدي اشربي شاي معايا
عنايات :شاي اية دلوقتي؟ ده انت رايقة اوي
هدى : طب انا هدخل اجيب الحاجة من جوة ثواني
عنايات : هوه ده الكلام (استعنا عالشقى بالله...)
وبعد نص ساعة خرج من العمارة اتنين ستات لابسين نقاب وركبوا عربية هدى واتجهوا لمقر شركة عبده واول ما وصلوا عند باب الشركة :
عنايات : انا خايفة لا عبده يشوفني
هدى :جرالك ايه يا عنايات ده لايمكن يعرفك حتى لو مشي من جنبك اجمدي امال
عنايات :آه صحيح ,انا جامده اهوه (ربنا يستر)
جوه المكتب بتاع عبده كل واحد عمال يشتغل ومركز في اللي بيعمله ماعدا منى عماله كل شوية تبص لعبده وتفكر (بجد شكله مش متجوز ولا مخلف ....وكمان بيشتغل بضمير اوي مش زي باقي المهندسين هنا ...اه لو كنت قابلته زمااااااان)
الساعي بيدخل المكتب ويقول:
الساعي : يا باشمهندسه منى في ناس عايزينك بره في الاستقبال
منى : ناس مين دول انا مش مستنية حد؟
الساعي :مش عارف يا فندم
منى :طيب روح وانا جاية ,بعد اذنكوا يا جماعة
احمد :اتفضلي يا منى
وعبده مردش عشان مركز في اللي بيعمله
منى تخرج تلاقي اتنين منتقبات واقفين وهيه متعرفش حد منتقب خالص
منى :صباح الخير اي خدمة؟
هدى:السلام عليكم ورحمة الله وبركاته
منى :وعليكم السلام ورحمة الله
هدى : احنا امل وفاء اخوات الدكتور محمد حامد حامد
منى : اتشرفنا اي خدمة
هدى : احنا جايين ناخد منك معاد عشان نجيلكم البيت نتعرف على الوالد والوالدة
منى :بخصوص اية؟
هدى:اخونا بيدو على عروسة وولاد الحلال دلوه عليكي
منى: طيب ممكن تدوني فرصة افكر الأول؟
هدى : فكري براحتك يا حبيبتي وده رقم موبايلي ويا ريت تديني رقمك عشان اطمن على الرد
منى اوي اوي اتفضلي وان شاء الله خير,ومشيوا هدى وعنايات على وعد انهم هيتصلوا بيها بالليل يطمنوا على الاخبار
طبعا هدى كانت اشترت خط امبارح عشان يقدروا يتكلموا منه براحتهم,وأول ما دخلوا العربية هدى بتسأل عنايات
هدى : عنايات مالك يا حبيتي انتي منطقتيش ولا كلمة؟
عنايات:انتي شوفتي لبسها عامل ازاي؟ ولا البيرفيوم ولا شعرها ده مزه اوي
هدى:ايه يا عنايات ده طب ابقي شوفيها وهيه صاحية من النوم مش هتعرفيها اساسا
عنايات : لا الموضوع طلع مش سهل ولازم نفكر كويس عشان نتصرف صح
هدى : على فكرة انا طاوعتك بس عشان اريحك لكن بلاش تشكي في جوزك ده انسان محترم جدا
عنايات: انا مش بشك في عبده انا خايفة هي تلعب عليه وعبده ملوش تجارب غيري انا بس والراجل اللي ملوش تجارب ممكن اي واحدة توقعه بسهوله...
هدى:طيب وهتعملي ايه دلوقت؟
عنايات:انا مش هعل اي حاجة غير لما طنط تروح بالليل بيتها وبعدين هقولك هعمل ايه
هدى :طيب يلا نروح بسرعة عشان نعمل الاكل ونشوف اللي ورانا
عنايات مردتش عشان بتفكر ازاي تقدر تبعد منى عن عبده قبل ما يحس انها معجبة بيه او هوه يفكر فيها ......
بالليل نزل عبده يوصل مامته واول ما رجع البيت لقي النور مطفي ومفيش صوت فاستغرب هما راحوا فين معقولة عنايات نامت من غير ما تستناني؟؟؟؟
هكملكوا اللي حصل المرة اللي جاية ان شاء الله